Prezıdent: Halyq kommýnaldyq qyzmetke tólegen aqshasy qaıda ketip jatqanyn kórip otyrýy tıis

ASTANA. QazAqparat – Qosymsha qarjy tek qana kommýnaldyq ınfraqurylymdy jańǵyrtýǵa jumsalýy kerek. Bul týraly eldiń áleýmettik-ekonomıkalyq máseleleri jónindegi keńeıtilgen keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Tarıfti ósirýden túsken qosymsha qarjy tek qana kommýnaldyq ınfraqurylymdy jańǵyrtýǵa jumsalýy kerek. Sondaı-aq jańa qýat kózderin iske qosýǵa jáne jumysshylardyń jalaqysyn kóterýge baǵyttalýy qajet. Monopolısterdiń mindeti muqııat naqtylanyp, tolyǵymen oryndalýǵa tıis. Sondyqtan Úkimetke qarjynyń jumsalýyn baqylaıtyn qatań amal-tásilder engizýdi tapsyramyn. Oǵan tsıfrlyq baqylaý júıesin de engizý kerek», - dedi Qasym-Jomart Toqaev.

Osy oraıda Prezıdent bul saladaǵy qarajattyń ıgerilýin qatań baqylaý kerek ekenin aıtty.

«Jurt kommýnaldyq qyzmet úshin tólegen aqshasy qaıda ketip jatqanyn kórip otyrýǵa tıis. Qazirgi zamanǵy aqparattyq tehnologııa buǵan tolyq múmkindik beredi», - dedi Memleket basshysy.

Osyǵan deıin Prezıdent jańa óndiris pen jumys oryndaryn ashqan aktıv ıeleri eshqandaı problemaǵa tap bolmaıtynyn aıtty.