Prezıdent grantyn utyp alǵan qaraǵandylyq jastar qandaı jobalar usynady

QARAǴANDY. QazAqparat – «Táýelsizdik urpaqtary» atty jas talanttar baıqaýynda QR Prezıdentiniń grantyn jeńip alǵan qaraǵandylyq Dýman Ákim men Rýzı Shıhov mádenıet jáne medıtsına salalarynda tyń jobalar oılap tapqan, dep habarlaıdy QazAqparat oblys ákimdigine silteme jasap.

Jeńimpazdarǵa 3 mln teńge kólemindegi granttardy Memleket basshysy Qasym-Jomart Toqaev tabystaǵan bolatyn.

«Táýelsizdik urpaqtary» baıqaýy QR Táýelsizdiginiń 30 jyldyǵyn merekeleý aıasynda jazda jarııalandy. Baǵyttary: «Ǵylym», «Mádenıet», «Aqparattyq tehnologııalar», «Bıznes» jáne «Medıa». Nátıjesinde 410 ótinimniń arasynan 12 óńirden úzdik 30 jas irikteldi. Jeńimpazdar arasynda eki qaraǵandylyq boldy.

Qazaq ulttyq óner ýnıversıteti kolledjiniń oqytýshysy Dýman Ákim «Mádenıet» baǵytynda jeńiske jetti. Komıssııa onyń «Teatr-Shyǵarmashylyq-Talant» Halyqaralyq balalar men jasóspirimder teatr festıval-baıqaýynyń jobasyn atap ótti.

«Jeke tulǵany qalyptastyrýda mádenıetke erekshe ról beriledi. Óskeleń urpaqty ónerge qyzyqtyrý úshin men «Teatr-Shyǵarmashylyq-Talant« jobasyn daıyndadym. Balalar sahnada óner kórsetetin biregeı teatr ashýdy, mádenıet pen óner arqyly elimizdi tanytýdy armandaımyn. Grant talantty jastarǵa óz áleýetin kórsetýge múmkindik beredi», – deıdi Dýman Ákim.

Jezqazǵan kópsalaly aýrýhanasynyń epıdemıolog-dárigeri Rýzı Shıhov «Aqparattyq tehnologııalar» baǵyty boıynsha grant ıegeri atandy. Ol Donormyn mobıldik qosymshasyn ázirleýshisi bolyp tabylady.

«Qan tapsyrý – eldiń ulttyq qaýipsizdigi máselesi. Bizdiń júıemizdiń arqasynda biz Qazaqstanda qan donorlarynyń sanyn halyqaralyq standarttar deńgeıine deıin ulǵaıtqymyz keledi (1 000 turǵynǵa 40-60 adam). Eger Astanada jáne respýblıkalyq mańyzy bar qalalarda bul san halyqaralyq standarttar deńgeıinde bolsa, óńirlerde ol az. Grant qarajaty saıt pen qosymshany ázirleýge jumsalady», – dep atap ótti Rýzı Shıhov.