EQDB «jasyl ekonomıka» talaptaryn oryndaý aıasynda elimizge 2 mıllıard eýro quımaq

<p>ASTANA. KAZINFORM &ndash; Qasym-Jomart Toqaev Sheteldik ınvestorlar keńesiniń 36-shy plenarlyq otyrysyna qatysý úshin Qazaqstanǵa kelgen Eýropalyq qaıta qurý jáne damý bankiniń prezıdenti Odıl Reno-Bassomen kezdesý ótkizdi.&nbsp;</p>

Áńgimelesý barysynda turǵyn úı-kommýnaldyq sektory, shaǵyn jáne orta bıznes, qarjy, energetıka, medıtsına, aýyl sharýashylyǵy, kólik ınfraqurylymy jáne aqparattyq tehnologııa sııaqty ekonomıkanyń túrli salalarynda birlesken ınvestıtsııalyq jobalardy júzege asyrý perspektıvasy talqylandy.

Memleket basshysy Eýropalyq qaıta qurý jáne damý bankimen yntymaqtastyqtyń strategııalyq sıpatyn, sondaı-aq qarjy ınstıtýtynyń Qazaqstan ekonomıkasyn órkendetýge qosqan úlesin joǵary baǵalady. 

EQDB prezıdenti elimizdiń ornyqty damýyna, ınvestıtsııalyq ahýalynyń jaqsarýyna jáne ekonomıkalyq jańǵyrýyna áser etetin ózara yqpaldastyqtyń áleýetti baǵyttaryna qatysty josparymen bólisti. Odıl Reno-Basso bank Qazaqstannyń ınvestıtsııalyq jobalaryn muqııat zerdeleıtinin jetkizip, ınfraqurylymdyq damýdy aldaǵy ýaqytta da qoldaýǵa nıetti ekenin málimdedi.

EQDB taıaý jyldary «jasyl ekonomıka» talaptaryn oryndaý aıasynda elimizge 2 mıllıard eýro quıýdy josparlap otyr. Bıyl Eýropalyq qaıta qurý jáne damý banki Qazaqstandaǵy 22 jobany júzege asyrýǵa 650 mıllıon dollar bóledi. EQDB prezıdenti «Samuryq-Qazyna» aktsıonerlik qoǵamynyń satyp alý úderisine oń baǵa berdi. Onyń aıtýynsha, kredıtor-kompanııalardyń qor erejesine sáıkes jumys isteýi atalǵan satyp alý úderisiniń ashyqtyǵyna senim joǵary ekenin kórsetedi.

Qasym-Jomart Toqaev pen Odıl Reno-Basso jahandyq ekonomıkanyń damýyna qatysty ózekti máseleler jóninde pikir almasty.