Prezıdent elordadaǵy JEO-3-tiń 2 kezegi men 3-shi gaz qazandyǵynyń qurylysyna qatysty usynys engizýdi tapsyrdy

ASTANA. QazAqparat – Astana turaqtylyq pen ornyqty damýdyń úlgisi bolýǵa tıis. Bul týraly elordany damytý máseleleri jónindegi keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Qala qarqyndy túrde ósip keledi, ınjenerlik jelilerge júkteme turaqty túrde arta túsýde. Sondyqtan JEO-3-tiń ekinshi kezegi men úshinshi gaz qazandyǵynyń qurylysyn kidirissiz jáne túpkilikti anyqtaý qajet. Bir aı merzimde tıisti usynystar engizýdi tapsyramyn. Bizdiń mindetimiz – Astanany kem degende on jyl buryn senimdi jylýmen qamtamasyz etý. Bul elordanyń turaqty damýy úshin de óte mańyzdy. Bul másele Astananyń memlekettiń ákimshilik jáne saıası ortalyǵy retindegi erekshe rólin eskere otyryp, strategııalyq mańyzǵa ıe», - dedi Prezıdent.

Memleket basshysy Astana elimizdiń ilgerileýiniń lokomotıvi sanalatyndyǵyn, sondyqtan turaqtylyq pen ornyqty damýdyń úlgisi bolýǵa tıistigin basa aıtty.

Jalpy, Úkimet barlyq óńirde jylytý maýsymyna daıyndyqty baqylaýda ustaýy kerek. Ekibastuzda turǵyndar 30 gradýs aıazda jylýsyz qalǵan jaǵdaıdyń qaıtalanýyna jol bermeý kerek. Jazdyń ortasy boldy, kóp ýaqyt qalmady. Sondyqtan barlyq qajetti jumystar qys mezgili kelgenge deıin aıaqtalýy tıis. Sýyq aýa raıy bastalǵanǵa deıin búkil el boıynsha jylý kózderi men kommýnaldyq jelilerdi tıisti kúıge keltirý úshin barlyq qajetti is-sharany qabyldaý qajet. Bul úshin ortalyq jáne jergilikti atqarýshy organdardyń tıimdi jáne úılesimdi jumysy, sondaı-aq merdigerler men jylý kózderi ıeleriniń jaýapty tásili talap etiledi», - dedi Qasym-Jomart Toqaev.