Prezıdent elordada qolma-qol aqshasyz tólem kólemin ulǵaıtýdy tapsyrdy
13:23, 08 Qazan 2019
NUR-SULTAN. QazAqparat - Elordada qolma-qol aqshasyz tólem jasaý kólemin ulǵaıtý qajet. Bul týraly Nur-Sultan qalasynyń ákimdiginde ótken elordany odan ary damytý máseleleri jónindegi májiliste Memleket basshysy Qasym-Jomart Toqaev aıtty, dep habarlaıdy QazAqparat tilshisi.
«Elordada kartamen qolma qol aqshasyz tólem jasaý úlesiniń eń tómen ekendigi baıqalady. Ol ne bári 9 paıyzdy ǵana quraıdy. Salystyrmaly túrde aıtsaq, Almatyda ol 69 paıyz. Bul problema qala turǵyndary men qonaqtaryna qolaısyzdyq týdyryp qana qoımaı kóleńkeli ekonomıkanyń da ósimine alyp keledi», - dedi Memleket basshysy.
Osyǵan oraı, Qasym-Jomart Toqaev atalǵan baǵytta naqty jumystar júrgizýdi tapsyrdy.
«Qarjy mınıstrligine qala ákimdigimen birlesip, qalanyń saýda núkteleri men qyzmet kórsetý salalalarynda kassalyq baqylaý mashınalary men karta termınaldarynyń bolýyna qatań baqylaýdy qolǵa alýdy tapsyramyn», - dedi QR Prezıdenti.