Prezıdent: Elimizde 7 iri ekojúıe qalyptastyrýǵa bolady

NUR-SULTAN. QazAqparat – Elimizde 7 iri ekojúıe qalyptastyrýǵa bolady. Bul týraly búgin Qazaqstan halqyna Joldaýyn jarııa etken QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

Memleket basshysynyń atap ótýinshe, aýyl sharýashylyǵy salasynda sheshimin tappaı kele jatqan ózekti máseleler bar. Atap aıtqanda jurttyń jerge qol jetkize almaýy, uzaq merzimge beriletin arzan nesıeniń bolmaýy, kásibı mamandardyń tapshylyǵy oryn alýda.

«Ónimdilikti arttyryp, shıkizat óndirýmen ǵana shektelmeý úshin, sondaı-aq qoıma jáne kólik ınfraqurylymyn damytý maqsatynda shuǵyl sharalar qabyldaý kerek. Elimizde et, jemis-jıdek, kókónis, qant, bıdaı, maıly daqyldar, sút ónimderin óndirý jáne óńdeý úshin 7 iri ekojúıe qalyptastyrýǵa bolady. Balyq sharýashylyǵyna da erekshe mán berilgeni jón. Qosymsha qun qalyptastyrýdyń ózegi sanalatyn iri jobalar mańyzdy ról atqarýǵa tıis», - dedi Memleket basshysy,

QR Prezıdentiniń atap ótýinshe, vertıkaldy kooperatsııa aıasynda jeke qosalqy sharýashylyqtyń áleýetin paıdalanǵan abzal.

«Jeke sharýashylyǵy mıllıondaǵan aýyl turǵynyna tabys tabýǵa múmkindik bere alady. Olardy óńirlik azyq-túlik habyn qurýǵa jumyldyrý kerek.», - dedi Qasym-Jomart Toqaev.