Prezıdent Elena Rybakınany 25-ke tolǵan týǵan kúnimen quttyqtady

<p>ORAL. KAZINFORM — Qazaqstan Prezıdenti Qasym-Jomart Toqaev tennısten ulttyq áıelder quramasynyń kóshbasshysy Elena Rybakınany týǵan kúnimen quttyqtady.</p>

Qazaqstan tennıs federatsııasynan málim etkendeı, Memleket basshysy sportshyǵa quttyqtaý hat joldady.

«Ýımbldondaǵy jáne basqa da bedeldi halyqaralyq jarysta tamasha jeńisterińizben qazaqstandyq tennıs tarıhy betterinen oıyp oryn aldyńyz. Aldaǵy ýaqytta da jankúıerdi keremet oıynyńyzben jáne jańa jeńisterińizben qýantyp, dene shynyqtyrý men sportty damytýǵa jáne ilgeriletýge úles qosatynyńyzǵa senimdimin. Sizge zor densaýlyq pen qut-bereke tileımin» delingen onda.

Qazaqstannyń birinshi, álemniń 4-raketkasy E.Rybakına búgin 25 jasqa toldy.

Búgin — sondaı-aq Qazaqstannyń erler arasynda birinshi, álemniń 17-raketkasy Aleksandr Býblıktiń de týǵan kúni. Ol 27 jastyń bıigine shyǵyp otyr.

Osy aptada E.Rybakına Berlınde, A.Býblık Gallede óner kórsetedi.

Eske sala keteıik, budan buryn Elena Rybakınanyń Berlınde Nıderlandtaǵy týrnırdiń chempıonymen kezdesýi múmkin ekenin jazǵan bolatynbyz.