Prezıdent eldiń emes, óz máselesin aıtyp qalýǵa tyrysatyn kásipkerler baryn aıtty

<p>ASTANA. KAZINFORM - Ulttyq quryltaıdyń úshinshi otyrysynda sóılegen sózinde Prezıdent elimizdegi kásipkerler jeke múddesin qoǵam múddesimen úılestire bilýi kerek ekenin basa aıtty.&nbsp;</p>

«Men Memleket basshysy retinde árbir máseleni ashyq talqylaýǵa daıynmyn. Ózderińizge málim, kásipkerlerimizben únemi kezdesip júremin. Bıznes ókilderi belgili bir saladaǵy saıasatty jetildirýge qatysty strategııalyq bastama kóteredi dep senemin. Olar ekonomıkanyń túrli salasyn damytý týraly naqty usynys aıtady dep úmittenemin. Alaıda, keıbir kásipkerler aldymen eldiń emes, óziniń máselesin aıtyp qalýǵa tyrysady. Tipti, bıznes-jobasyna qoldaý kórsetýdi, ózine jeńildik berýdi suraıdy. Sol úshin memlekettik organdarǵa tapsyrma berýimdi ótinedi. Bir sózben aıtsaq, baıaǵy, úırenshikti jolymen júrgisi keledi. Óz múddesin bárinen joǵary qoıyp, jeke máselesin memleket esebinen sheshýge umtylady. Basqa jurtqa qarańyzdar. Kóptegen eldiń, tipti, kórshi elderdiń ózinde iri kásipkerler memleketke alaqan jaımaıdy. Kerisinshe, týǵan elin damytýǵa óz erkimen qyrýar qarjy jumsaıdy. Osy elde kásibin jasap, baıyǵan adamdar qara basynyń ǵana emes, eldiń de qamyn oılaýǵa tıis dep sanaımyn. Olar jeke múddesin qoǵam múddesimen úılestire bilýi qajet», - dedi Qasym-Jomart Toqaev.