Prezıdent eki ulttyq joba ázirlenip jatqanyn aıtty

NUR-SULTAN. QazAqparat – 32 aýdandyq aýrýhana kópbeıindi medıtsınalyq mekemege aınalady. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Meniń tapsyrmammen Prezıdent Ákimshiligi «Qolaıly mektep» jáne «Aýyldyq densaýlyq saqtaýdy jańǵyrtý» eki ilki ulttyq jobalaryn ázirleýdi úılestiredi. Olardyń naqty mindeti jáne júzege asyrylý merzimi bar, naqty nátıjelerge baǵyttalǵan. Ne jaıynda ekendigin eske sala keteıin. «Qolaıly mektep» ulttyq jobasy zamanaýı qural-jabdyqtarmen qamtylǵan, jańa qurylys standarttary boıynsha shamamen 840 myń oqýshy orny qurylysyn kózdeıdi», - dedi Qasym-Jomart Toqaev.

Memleket basshysynyń aıtýynsha, «Aýyldyq densaýlyqty jańǵyrtý» ulttyq jobasy barlyq aýyldy qajetti medıtsınalyq ınfraqurylymmen qamtamasyz etýge múmkindik beredi. Ol 800 myńnan astam adam turatyn 650 eldi mekendi qamtıdy. 32 aýdandyq aýrýhanany kópbeıindi medıtsınalyq mekeme deńgeıine deıin jańartý josparlanǵan.

«Nátıjesinde shuǵyl jáne ortasha tehnologııalyq medıtsınalyq kómek alý úshin araqashyqtyq 500-den 200 shaqyrymǵa deıin qysqarady. Úkimet bıýdjettik protsess aıasynda osy jyldyń qyrkúıegine deıin barlyq esebin júrgizýi jáne atalǵan ulttyq jobalardy júzege asyrý úshin qajetti sharalar qabyldaýy qajet», - dedi Prezıdent.