Prezıdent EAEO-ny Úndistan, Egıpet, Indonezııa, Izraıl elderimen baılanysty nyǵaıtýǵa shaqyrdy

ASTANA. QazAqparat – Eýrazııalyq ekonomıkalyq odaq aıasynda túrli jeńildikter jóninde kelisim jasaǵan eldermen qarym-qatynastyń sapasyn jaqsartýǵa kúsh salatyn mezgil jetti. QR Prezıdenti Qasym-Jomart Toqaev Joǵary Eýrazııalyq ekonomıkalyq keńestiń Bishkektegi otyrysynda osyndaı paıym aıtty, dep habarlaıdy QazAqparat tilshisi.

«Ekinshi másele – halyqaralyq ekonomıkalyq áriptestikti damytý. Odaqtyń syrtqy saýda múddesi jyl saıyn keńeıip keledi. Bul jaǵymdy tendentsııa jáne Qazaqstan bul baǵytty qoldaıdy. Endi jeńildik kelisimsharttar bekitilgen áriptester arasyndaǵy ózara áreketterdiń sapasyn arttyrýǵa zer salý kerek. Áńgime Vetnam, Serbııa, Iran elderi týraly bolyp otyr», - dedi Memleket basshysy.

Qasym-Jomart Toqaev Úndistan, Egıpet, Indonezııa, Izraıl elderimen aradaǵy erkin saýda aımaǵy týraly kelisimder jónindegi jumystardy da jyldamdatý kerektigine toqtaldy.

«Qazaqstan Birikken Arab Ámirlikterimen erkin saýda aımaǵy týraly kelissózdiń bastalǵanyn quptaıdy. Bul bastamany aıtarlyqtaı perspektıvaly jáne eýrazııalyq bestiktiń báriniń múddesine saı dep esepteımin. Endi osy úderisti sozyp almaý mańyzdy», - dedi Qasym-Jomart Toqaev.

Aıta keteıik, Memleket basshysy Bishkekte Joǵary Eýrazııalyq ekonomıkalyq keńestiń otyrysyna qatysyp jatyr. Odaqqa múshe elderdiń basshylary qazir shaǵyn qurammen otyrys ótkizýde.

Buǵan deıin Prezıdent Qasym-Jomart Toqaevtyń Joǵary Eýrazııalyq ekonomıkalyq keńesiniń otyrysyna qatysý úshin Bishkek qalasyna jumys saparymen barǵany habarlanǵan edi.