Jańa Orleandaǵy qaıǵyly oqıǵa. Prezıdent Djozef Baıdenge kóńil aıtty

<p>ASTANA. KAZINFORM — Qasym-Jomart Toqaev Djozef Baıdenge kóńil aıtý jedelhatyn joldady, dep habarlaıdy Aqorda.</p>

— Memleket basshysy Jańa Orlean qalasyndaǵy qaıǵyly oqıǵa saldarynan kóptegen adamnyń qaza bolǵany týraly sýyt habardy kúızelispen qabyldaǵanyn jetkizip, AQSh Prezıdenti men jaqynynan aıyrylǵan otbasylarǵa óziniń jáne Qazaqstan halqynyń atynan kóńil aıtty. Sonymen qatar Prezıdent zardap shekkenderdiń tezirek saýyǵyp ketýine tilektestik bildirip, mundaı qastandyq áreketti qatań aıyptaıtynyn jetkizdi, — delingen habarlamada.

Eske salsaq, AQSh-tyń Jańa Orlean qalasynyń ortalyǵyndaǵy Býrbon kóshesinde qaıǵyly jaǵdaı boldy. Kólik tizgindegen qylmysker Býrbon kóshesinde jańa jyldy toılaýǵa jınalǵandardyń birnesheýin qaǵyp ketken. Sodan keıin ol kóliginen túsip, adamdarǵa oq jaýdyrǵan. Jantúrshigerlik oqıǵadan 15 adam qaza taýyp, 35 adam jaraqat aldy.