Prezıdent dóńgelek shyǵaratyn kásiporynǵa bardy

<p>ASTANA. KAZINFORM &ndash; Qaraǵandy oblysyna jumys sapary aıasynda Qasym-Jomart Toqaev Saran qalasyndaǵy kólik dóńgelekterin shyǵaratyn KamaTyresKZ zaýytyn aralap kórdi. Prezıdentke kásiporynnyń óndiris tsıkly men damý perspektıvasy tanystyryldy.</p>

Memleket basshysyna «Tatneft» JAQ Bas dırektory Naıl Maganov pen KamaTyresKZ zaýytynyń dırektory Radıı Býrganov qurylys-montaj jumystary aıaqtalyp, tehnologııalyq qural-jabdyqtar tolyqtaı jetkizilgenin aıtty. 234 mıllıard teńge kóleminde ınvestıtsııa salynǵan zaýytta ónimniń serııalyq óndirisi bastaldy. Ótken aıda KamaTyresKZ 30 myń dóńgelek shyǵarǵan. Zaýyt alǵashqy jyly ónim kólemin 1 mıllıonǵa deıin jetkize alady.

Prezıdentke dóńgelek qurastyratyn tsehtar men óndiris jelileri tanystyryldy. Zaýyttyń qural-jabdyǵy Latvııa, Italııa, Portýgalııa, Japonııadan jáne taǵy da basqa elderden ákelingen. Jalpy kásiporynda 800-ge jýyq tehnologııalyq qurylǵy ornatylǵan.

3aýyt 2027 jylǵa qaraı 3,5 mıllıon dóńgelek shyǵarady dep josparlanyp otyr. Qazirgi kezde kásiporynda 590 jumysshy eńbek etip jatyr. Keleshekte qyzmetkerler sany 1125 adamǵa deıin kóbeıedi. Óndiris jumysshylary «Tatneft» kompanııalar tobynyń dóńgelek shyǵaratyn kásiporyndarynda oqý-tájirıbeden ótken.

Zaýyt ónimi Attar brendimen tanylady jáne halyqaralyq standarttarǵa saı sertıfıkat ıelengen. Otandyq dóńgelekter shilde aıynan Qazaqstan men shet memleketterdiń naryǵynda satyla bastady. Bıyl elimizde qurastyrylatyn JAC markaly avtomobılder konveıerden Attar dóńgelekterimen shyǵady.