Prezıdent CITIC Group kompanııasynyń basqarma tóraǵasy Chjý Hesındi qabyldady
Áńgimelesý barysynda energetıka, munaı hımııasy ónerkásibi jáne basqa da mańyzdy salalardaǵy ózara seriktestikti nyǵaıtý máseleleri talqylandy.
Prezıdentke CITIC Group kompanııasy men Qazaqstannyń buǵan deıin qol jetkizgen ýaǵdalastyqtarynyń júzege asyrylý barysy týraly málimet berildi.
«Bizdiń turaqty kezdesýlerimiz aradaǵy yntymaqtastyqtyń strategııalyq sıpatyn bildiredi. Bıyl mamyr aıynda CITIC Construction kompanııasy qazaqstandyq seriktesterimen jalpy ınvestıtsııa kólemi 2 mıllıard dollar bolatyn jobalardy iske asyrý jónindegi 5 qujatqa qol qoıdy. Mańyzdy jobalardyń biri – Aqtaýdaǵy Caspi Bitum zaýytynyń munaı óńdeý qýatyn jylyna 1,5 mıllıon tonnaǵa deıin jetkizý. Maǵan «QazMunaıGaz» ben CITIC Group arasynda tıisti kelisimge qol qoıylǵany jóninde málimet berildi. Qurylys salasynda mol tájirıbeńiz bar ekenin eskersek, bul joba sapaly ári qysqa merzim ishinde júzege asyrylady dep oılaımyn», – dedi Memleket basshysy.
CITIC basqarma tóraǵasy Qazaqstan tarapymen ózara tıimdi yntymaqtastyqty joǵary baǵalady.
«Bizdiń SITIC korporatsııasy Qazaqstanda tabysty jumys istep jatyr. Maǵan jáne meniń áriptesterime búgin sizben júzdesý – zor mártebe. Bizdiń qyzmetimizdiń negizgi maqsaty – Qazaqstanmen aradaǵy yntymaqtastyqty nyǵaıtý», – dedi Chjý Hesın.
Budan bólek, kezdesý barysynda ınvestıtsııa jáne agroónerkásip kesheni salalaryndaǵy yntymaqtastyq perspektıvalary qarastyryldy.