Prezıdent tsıfrlandyrýǵa jaýapty vıtse-mınıstrlerdi ne úshin synady – Baǵdat Mýsın jaýaby
Keshe «Digital Bridge» halyqaralyq tehnologııalyq forýmynda Qasym-Jomart Toqaev tsıfrlandyrý isine jaýapty vıtse-mınıstrler jumysynyń nátıjeliligin synǵa aldy. Prezıdent jyl sońyna deıin tsıfrlandyrýǵa jaýapty árbir vıtse-mınıstr úshin naqty KPI ázirleýdi talap etti jáne Premer-Mınıstrge olardyń qyzmetine qatysty ustanymdy qaıta qaraýdy, kadrlyq quramyna baǵa berýdi tapsyrdy.
«Shyn máninde, keıbir vedomstvolarda tsıfrlandyrýǵa jaýapty vıtse-mınıstrler kompıýterlik tehnıka satyp alyp, serverlerdi satyp alý úshin tehnıkalyq sıpattamalar jazatyn aqparattyq tehnologııalar jónindegi vıtse-mınıstrlerge aınalyp ketti. Eger basshylyqta ınternetten aqaý tabylsa, osy retteý jumystary tsıfrlandyrý jónindegi vıtse-mınıstrge júkteldi. Shyn máninde, tsıfrlandyrý jónindegi vıtse-mınıstr tsıfrlyq transformatsııany ilgeriletýmen aınalysýy kerek. Tsıfrlyq transformatsııa protsesterdi avtomattandyrýdan ózgeshelenedi», - dep jaýap berdi mınıstr Ortalyq kommýnıkatsııalar qyzmetinde tilshi jaýabyna.
Mınıstr avtomattandyrý men tsıfrlyq transformatsııanyń aıyrmashylyǵy nede ekenin túsindirip berdi.
«Avtomattandyrýmen qandaı da bir ádistemelik tapsyrmalar berilgen kezde aınalystyq. Mysaly, jer qoınaýyn paıdalanýǵa lıtsenzııa nemese quqyq berý. Bul quqyq zańnamalyq aktilerde jáne tıisti nusqaýlyqtarda sıpattaldy. Oǵan jetekshilik etetin salalyq vıtse-mınıstr nemese salalyq departament ony avtomattandyrý kerek dep jazdy, sodan keıin IT mamandary osy protsesterdi avtomattandyrýmen aınalysty. Biz qoldanystaǵy normatıvtik-quqyqtyq aktilerdi negizge alyp, bıznes-protsesterdi avtomattandyrýmen aınalystyq», - dedi B. Mýsın.
Bul rette Tsıfrlyq damý mınıstri avtomattandyrýdyń qoldanystaǵy protsesterdi jolǵa qoıý ekenin atap ótti. Al tsıfrlyq transformatsııa –qazirgi protsesterdi tolyǵymen qaıta qaraý.
«Mysaly, ótken jyly halyqqa qyzmet kórsetý ortalyqtaryna kelýshilerdiń kóp ekenin baıqadyq. Onda da jaǵdaıdy túzetýge, ondaǵy protsesterdi avtomattandyrýǵa bolar edi. Biraq biz kóptegen qyzmetti onlaın rejıminde kóshirýdi uıǵardyq. Ekinshi deńgeıdegi banktermen birlesip, avtokólikti onlaın satý, onlaın tirkeý servısi jasaldy, tsıfrlyq transformatsııa degenimiz osy. Sol kezde biz ETsQ, ınternet, derekter bazasy jáne bıometrııa bar ekenin túsindik. Onda adamdarǵa HQKO-ǵa barýdyń ne qajeti bar? Іshki ister mınıstrligine usynys jasaǵanymyzda olar da kelisim berip, ıdeıalardy jyldam iske asyrdyq. Qazir avtokólikterdiń 36 paıyzy onlaın rejımde qaıta rásimdeledi. Adamdar HQKO-ǵa barmaıdy. Endi kez kelgen protsesti qaıta qarastyrý qajet. Mine, tsıfrlyq transformatsııa jónindegi vıtse-mınıstrler ár protsesti avtomattandyryp qana qoımaı, bastan-aıaq qarastyrýy kerek, Prezıdent osyny synǵa aldy», - dep túsindirdi Baǵdat Mýsın.
Mysal retinde mınıstr múgedektigi bar adamdardyń múgedektik belgileý men járdemaqy alý úshin 4 orynǵa barýǵa májbúr bolǵanyn eske saldy.
«Bul protsesti Eńbek jáne áleýmettik qorǵaý vıtse-mınıstrimen birlesip, tolyǵymen qaıta qarap, jańa mehanızm usyndyq. Adam emhanaǵa tek bir ret barady, medıtsına qyzmetkeri bárin derekqorǵa engizedi, sodan keıin barlyq protsess onlaın rejımde ótedi, onymen baılanys SMS nemese mobıldi qosymsha arqyly júredi. Tsıfrlyq transformatsııanyń da negizgi máni sol –barlyq protsesti qaıta qaraý, bar nárseni avtomattandyrmaý. Qasym-Jomart Kemelulynyń da, meniń jumysymnyń da kútetini osy. Tsıfrlandyrý jónindegi árbir vıtse-mınıstr salaǵa tereń úńilip, transformatsııalaýǵa jáne sybaılas jemqorlyq táýekeldermen jáne t.b. qazirgi jaǵdaıdy ózgertýge kómektesetin jańalyqtardy usynýy qajet», - dedi Baǵdat Mýsın.