Prezıdent: Bizge Ońtústik Koreıa tehnologııasyn ónerkásipke engizý mańyzdy

<p>ASTANA. KAZINFORM — Prezıdent Qasym-Jomart Toqaev Qazaqstan-Koreı bıznes forýmynda ekijaqty ekonomıkalyq baılanysty «Investıtsııalar men tehnologııalar — shıkizat ornyna» qaǵıdatymen damytýǵa bolatynyn aıtty. </p>

«Endi áriptestiktiń anaǵurlym keleshegi zor baǵyttary týraly paıymymyzdy tanystyrýǵa ruqsat etińizder. Birinshi — bizdiń ekonomıka úshin mańyzdy salalardaǵy kooperatsııanyń arttyrý. Bul — jer qoınaýyn paıdalaný jáne ónerkásip. Munaı-gaz salasynda bizge ońtústikkoreıalyq tehnologııanyń tolyqqandy transferti, sondaı-aq, zamanaýı qondyrǵylar men qosalqy bólshekterdiń óndirisin jolǵa qoıý mańyzdy. Bizdiń Teńiz, Qashaǵan, Qarashyǵanaq sııaqty munaı-gaz ken oryndarymyzdyń keńeıip jatqanyn eskersek, bul óte qajet», — dedi Memleket basshysy bıznes-forýmnyń ashylý saltanatynda sóılegen sózinde. 

Qasym-Jomart Toqaevtyń sózinshe, elimizde 5 myńǵa jýyq barlanbaı jatqan ken orny bar.

«Keıinnen munaı ben gaz shógindilerin ıgerýdi kózdeıtin tolyq aýqymdaǵy geologııalyq barlaý jumystaryn júrgizý úlken múmkindikter ashady. Asa mańyzdy shıkizatty „Investıtsııalar men tehnologııalar — shıkizat ornyna“ pragmatıkalyq formýlasy boıynsha óndirý jáne qaıta óńdeý keleshegi asa zor baǵyt bolyp esepteledi. Bizdiń jer qoınaýymyz paıdaly qazbalardyń aıtarlyqtaı qoryn boıynda saqtap jatyr. 5 myńǵa jýyq barlanbaǵan ken oryndary bar», — dedi Prezıdent.