Prezıdent: Biz demografııalyq quldyraýdy eńserdik
«Osydan týra bir jyl buryn men aýqymdy saılaý kezeńi bastalatynyn aıtqan edim. Qysqa merzim ishinde Prezıdent, Senat pen Májilis, barlyq deńgeıdegi máslıhattar saılaýy kezeń-kezeńimen ótti. Onyń bári jańa ári ádil erejemen júrgizildi. Bul saılaýlar azamattarymyzdyń saıası jáne saılaý mádenıetiniń deńgeıi óskenin kórsetti. Aýyl ákimderin tikeleı saılaýdyń engizilýi saıası reformadaǵy asa mańyzdy qadamnyń biri boldy. Qazirge deıin 1900-den astam aýyl okrýgynda saılaý ótti. Aýyl ákimderiniń 60 paıyzǵa jýyǵy jańardy. Jaqynda aýdan jáne oblystyq mańyzy bar qala ákimderin azamattarymyz tikeleı saılaıtyn bolady. Ázirge jańa tásildiń tıimdiligin baıqap kóremiz. Adam quqyǵyn qorǵaý júıesi jetile tústi. Konstıtýtsııalyq Sot qaıta quryldy. Ombýdsmenderdiń mártebesi kóterilip, quzyreti keńeıdi. Turmystyq zorlyq-zombylyq jasaǵan adamdarǵa jaza kúsheıtildi», - dedi Memleket basshysy.
Prezıdenttiń atap ótýinshe, Qazaqstan áleýmettik salada aıtarlyqtaı tabysqa qol jetkizdi. Halyqtyń densaýlyǵyn jaqsartý úshin qomaqty qarjy bólinip jatyr. Sonyń nátıjesinde azamattardyń ortasha jasy 74,4 jasqa jetti. Bul – el tarıhyndaǵy rekordtyq kórsetkish.
«Qıyndyǵy kóp bolǵan toqsanynshy jyldarda halyq sany kúrt azaıdy. Biz qazirgi tańda osy demografııalyq quldyraýdy eńserdik. Kóp uzamaı halqymyzdyń sany 20 mıllıonǵa jetedi. Bul elimizdiń turaqty damýynyń aıqyn kórinisi deýge bolady. Bir sózben aıtqanda, azamattarymyz óz urpaǵynyń jarqyn bolashaǵyna jáne elimizdiń erteńine senimmen qaraıdy. «Ulttyq qor – balalarǵa» bastamasyn júzege asyrý úshin tıisti zań qabyldandy. Nebári eki aıdan keıin balalarymyzdyń esep-shotyna qarjy túse bastaıdy», - dedi Qasym-Jomart Toqaev.
Prezıdent memlekettik saıasattaǵy mańyzdy baǵyttyń biri – aımaqtardy jan-jaqty damytý ekendigine nazar aýdartty.
«Qýatty aımaqtar – qýatty memleket» degenimiz – jalań uran emes. Bul – Ádiletti Qazaqstandy qurýǵa qajetti eń basty qaǵıdat. Biz byltyr elimizdiń ákimshilik-aýmaqtyq qurylymyna birqatar ózgeris engizdik. Sol arqyly keıbir oblystyń damýyna tyń serpin berdik. Meniń tapsyrmammen aýyl-aımaqty damytý tujyrymdamasy qabyldandy. Bul qujattyń mán-mańyzy zor. Aımaqtarda áleýmettik, ınjenerlik jáne kólik ınfraqurylymyn qurý – basty mindet», - dedi Memleket basshysy.
Qasym-Jomart Toqaev «Aýylda densaýlyq saqtaýdy jańǵyrtý» ulttyq jobasy bastalǵanyn atap ótti.
«Osy jobanyń aıasynda 655 ambýlatorııa jáne feldsherlik-akýsherlik nysan salynady, qural-jabdyqpen tolyq qamtamasyz etiledi. Buǵan qosa, 20 aýdanaralyq kópbeıindi emhana ashylady, al 12 emhana zaman talabyna saı jańarady. ıAǵnı, tórt mıllıonnan astam aýyl azamatyna sapaly dárigerlik qyzmet kórsetiledi. Elimizde «Jaıly mektep» jobasy qolǵa alyndy. 2026 jylǵa deıin barlyq aımaqta júzdegen jańa mektep boı kóteredi. Aýyldarda 100 sport ortalyǵy ashylady. Sondaı-aq, 650 mádenıet oshaǵy salynady jáne jóndeledi», - dedi Prezıdent.