Prezıdent bıýdjettik shyǵystardyń basymdyqtaryn qaıta qaraýdy júktedi

ASTANA. QazAqparat - Elbasy Nursultan Nazarbaev Qazaqstan halqyna arnalǵan Joldaýyn jarııalaý barysynda «Astana» Halyqaralyq qarjy ortalyǵynyń alańyn belsendi paıdalanýdy tapsyrdy, dep habarlaıdy QazAqparat tilshisi.

«Bıznesti sheteldik ınvestıtsııalarmen qamtamasyz etýde, kapıtalǵa qol jetkizýde mańyzdy róldi «Astana» Halyqaralyq qarjy ortalyǵy atqarýy tıis. Biz arnaıy túrde bólek sotty, qarjylyq retteýshini, bırjany qurdyq. Barlyq memorgandar, ulttyq kompanııalar qarjylandyrý úshin AHQO alańyn belsendi túrde paıdalanýy kerek», - dedi Elbasy.

Budan bólek, Prezıdent ál-aýqatymyzdyń ekinshi bir sıpaty - ómir súrý deńgeıiniń artýyna qatysty ekenin atap ótti. «Bilim berýdiń, densaýlyq saqtaý salasynyń, turǵyn úıdiń sapasy men qoljetimdiligi, jaıly jáne qaýipsiz jaǵdaıda ómir súrý máseleleri árbir qazaqstandyq otbasyna qatysty.   Osyǵan oraı, Úkimet áleýmettik sektorǵa, qaýipsizdik pen ınfraqurylymǵa mán bere otyryp, bıýdjet shyǵystarynyń basymdyqtaryn qaıta qaraýǵa tıis»,  - dedi N. Nazarbaev.

Osy oraıda Memleket basshysy atalǵan salalarǵa shyǵystardy baǵyttaý kerektigin atap ótti.

Aıta keteıik, QR Prezıdenti Nursultan Nazarbaev osy ýaqytta Aqordada Qazaqstan halqyna Joldaýyn jarııalaýda.Strategııalyq qujat elimizdiń áleýmettik-ekonomıkalyq damýynyń ózekti máselelerine jáne qazaqstandyqtardyń ál-aýqatyn odan ári arttyrý mindetterine arnalǵan.