Prezıdent BUU Dúnıejúzilik týrıstik uıymynyń Bas hatshysy Zýrab Pololıkashvılıdi qabyldady

<p>ASTANA. KAZINFORM &mdash;&nbsp; Qasym-Jomart Toqaev V Dúnıejúzilik kóshpendiler oıyndarynyń ashylý saltanatyna qatysqany úshin UNWTO delegatsııasyna jáne Zýrab Pololıkashvılıge rızashylyǵyn bildirdi, dep habarlaıdy Aqordanyń baspasóz qyzmeti.</p>

Prezıdent bul aýqymdy is-shara halyqtar arasyndaǵy dostyqty nyǵaıtýǵa, Qazaqstannyń ımıdjin ilgeriletýge, elimizdiń baı mádenı-tarıhı murasyn dáripteýge septigin tıgizetinin atap ótti.

Qasym-Jomart Toqaev Qazaqstannyń Uıymmen tyǵyz yntymaqtastyqqa beıildi jáne týrızm salasyndaǵy birlesken bastamalardy júzege asyrýǵa daıyn ekenin jetkizdi.

Bas hatshy Zýrab Pololıkashvılı qonaqjaılyq tanytqany úshin Memleket basshysyna alǵys aıtyp, V Dúnıejúzilik kóshpendiler oıyndarynyń uıymdastyrylý deńgeıine joǵary baǵa berdi. Onyń pikirinshe, mundaı is-sharalar týrızmdi jáne jalpy el ekonomıkasyn damytýǵa jol ashady. 

Kezdesý barysynda Qazaqstannyń BUU Dúnıejúzilik týrıstik uıymymen seriktestik aıasyn keńeıtý perspektıvasy talqylandy. Elimizdiń týrıstik áleýetin jáne halyqaralyq arenadaǵy bedelin arttyrýǵa yqpal etetin naqty jumystarǵa basa nazar aýdaryldy.