Prezıdent BUU Dúnıejúzilik azyq-túlik baǵdarlamasynyń atqarýshy dırektory Sındı Makkeınmen kezdesti
Prezıdent búgingi kezdesý jahandyq azyq-túlik qaýipsizdigi máselesin sheshýge baǵyttalǵan Qazaqstan men atalǵan uıym arasyndaǵy seriktestikti talqylaýǵa zor múmkindik beretinin atap ótti.
Memleket basshysy elimizdiń jahandyq azyq-túlik qaýipsizdigin qamtamasyz etý jáne BUU, Azyq-túlik qaýipsizdigi jónindegi Islam uıymy sekildi basqa da halyqaralyq uıymdar aıasynda gýmanıtarlyq kómek kórsetý boıynsha júzege asyryp jatqan sharalary jaıynda aıtty.
2023 jyly Qazaqstan alty memleketke 9,2 mıllıon dollar kóleminde gýmanıtarlyq kómek kórsetti.
Elimiz Gaza sektoryndaǵy kúrdeli ahýaldy eskere otyryp, Palestına halqyna qaıyrymdylyq sharasy retinde 1 mıllıon dollar bóldi jáne 2 ret gýmanıtarlyq kómek jetkizdi.
Sondaı-aq tabıǵı apattan zardap shekken Aýǵanstan, Túrkııa, Pákistan jáne basqa da elderge qarjylaı kómek kórsetti.
Prezıdent Aýǵanstandaǵy jaǵdaıǵa basa nazar aýdardy.
Memleket basshysynyń pikirinshe, halyqaralyq qoǵamdastyqtyń osy eldegi gýmanıtarlyq daǵdarysty toqtatý isin jalǵastyrýy óte mańyzdy.
Qasym-Jomart Toqaev qazir Almatyda Ortalyq Azııa men Aýǵanstan úshin BUU-nyń Ornyqty damý jónindegi aımaqtyq ortalyǵyn ashý jumystary júrgizilip jatqanyn jetkizdi.
Bul ortalyqtyń qyzmeti aımaqtaǵy beıbitshilikti, qaýipsizdikti jáne ornyqty damýdy nyǵaıtýda BUU-nyń vedomstvoaralyq úılestirý jumysyn retteýge múmkindik beredi.
Kezdesý sońynda Qasym-Jomart Toqaev Sındı Makkeındi aldaǵy Astana halyqaralyq forýmyna qatysýǵa shaqyrdy.
Memleket basshysy sondaı-aq BUU Azyq-túlik jáne aýyl sharýashylyǵy uıymynda (FAO), sondaı-aq Dúnıejúzilik azyq-túlik baǵdarlamasynda (WFP) jumys isteıtin bir top Qazaqstan azamattarymen júzdesti.