Prezıdent Búkilqytaılyq halyq ókilderi jınalysy Turaqty komıtetiniń tóraǵasy Chjao Letszımen kezdesti
– Boao forýmyna qatysqanyma qýanyshtymyn. Bul óte mańyzdy ári qoldaýǵa laıyqty shara dep sanaımyn. Sondyqtan men arnaıy kelip, forýmda sóz sóıleýge sheshim qabyldadym. Osy múmkindikti paıdalana otyryp, Tóraǵa Sı Tszınpınge jyly lebizimdi joldaǵym keledi. Onyń shilde aıynyń basynda Qazaqstanǵa jasaıtyn memlekettik saparyn asyǵa kútemiz. Tóraǵa Sı Tszınpınniń dana basshylyǵymen qolǵa alynǵan mańyzdy bastamalardyń bári tolyqtaı júzege asatynyna senimdimiz. Sı Tszınpın myrzanyń elderimiz arasyndaǵy tatý kórshilik, ǵasyrlar boıy jalǵasyp kele jatqan dostyq qatynastardy jáne máńgilik ári jan-jaqty strategııalyq seriktestikti nyǵaıtýǵa qosqan jeke úlesin joǵary baǵalaımyz. Birlesken kúsh-jigerdiń arqasynda barlyq baǵyt boıynsha tıimdi memleketaralyq yqpaldastyqty jolǵa qoıdyq. Sı Tszınpın myrzamen Beıjińdegi kezdesýdi erekshe yqylaspen eske alamyn. Meniń oıymsha, Qazaqstan men Qytaı arasyndaǵy yntymaqtastyqty tereńdetýge jáne ártaraptandyrýǵa baǵyttalǵan kúsh-jigerimiz óz jemisin beredi, – dedi Qasym-Jomart Toqaev.
Memleket basshysy qazaq-qytaı yntymaqtastyǵyn múlde jańa deńgeıge kóterýge taraptar bar kúshin jumsaıtynyn aıtty.
– Jalpy, Qytaımen aradaǵy dostyq pen yntymaqtastyqty nyǵaıtý biz úshin negizgi basymdyq sanalady. Jan-jaqty strategııalyq seriktestik qatynastardy damytý maqsatynda Úkimettiń barlyq vedomstvosyn QHR-dyń tıisti memlekettik uıymdarymen tyǵyz qarym-qatynasta jumys isteýge baǵyttaımyz. Búgin forýmda sóılegen sózimde eki eldiń yntymaqtastyǵyna, saýda-sattyqty órkendetýge, Qazaqstan ekonomıkasynda Qytaı ınvestıtsııasynyń artyp kele jatqanyna baılanysty naqty mysaldar keltirdim. Árıne, munyń bári aıryqsha mánge ıe. Osy oraıly sátti paıdalanyp, Sizdi Búkilqytaılyq halyq ókilderi jınalysy Turaqty komıtetiniń tóraǵasy retinde Qazaqstanǵa resmı saparmen kelýge shaqyrýymdy taǵy bir márte rastaǵym keledi, – dedi Prezıdent.
Chjao Letszı Qasym-Jomart Toqaevqa iltıpat bildirip, qazaq-qytaı qatynastary qarqyndy damyp kele jatqanyn atap ótti.
– Qurmetti Prezıdent Toqaev myrza, Sizben kezekti ret kezdeskenime óte qýanyshtymyn. Eń aldymen, Sizge Tóraǵa Sı Tszınpınniń shynaıy sálemi men izgi lebizin jetkizgim keledi. Qytaıda jyl saıyn ótetin Boao Azııa forýmyna qosh keldińiz! Sizdiń osy jıynǵa qatysýyńyz qytaı-qazaq baılanystaryn damytýǵa erekshe mán beretinińizdi jáne forým jumysyna zor qoldaý kórsetetinińizdi bildiredi. Jýyrda elińiz kóktemniń dástúrli meıramy – Naýryzdy toılady. Oraıly sátti paıdalana otyryp, Sizdi jáne dostas Qazaqstan halqyn osy merekemen quttyqtaımyn. Byltyr Tóraǵa Sı Tszınpınmen Sıanda jáne Beıjińde eki ret kezdestińiz. Ekijaqty qarym-qatynasty damytý jónindegi jańa ári aýqymdy jospar aıqyndaldy. Qytaı tarapy memleketter basshylary qol jetkizgen mańyzdy ýaǵdalastyqtardy iske asyrý, saıası senimdi nyǵaıtý jáne strategııalyq maqsattarǵa qol jetkizý jolyndaǵy ózara yntymaqtastyqty tereńdetý úshin qazaqstandyq áriptesterimen birlesip jumys isteýge daıyn, – dedi Chjao Letszı.
Kelissóz barysynda saýda-ekonomıkalyq jáne mádenı-gýmanıtarlyq yntymaqtastyqty odan ári nyǵaıtý perspektıvalary jan-jaqty talqylandy, sondaı-aq kólik, ónerkásip, týrızm jáne basqa da salalardaǵy birlesken jobalardyń iske asyrylý barysy qarastyryldy.