Prezıdent búgin qol qoıǵan Memlekettik satyp alý týraly zańnyń qandaı erekshelikteri bar
Zań Prezıdenttiń 2022 jylǵy 1 qyrkúıektegi «Ádiletti memleket. Birtutas ult. Berekeli qoǵam» atty Qazaqstan halqyna Joldaýyn júzege asyrý maqsatynda qabyldandy.
Jalpy, zań satyp alý protsesiniń rásimderin ońtaılandyrýdy, satyp alynatyn taýarlardyń, jumystar men kórsetiletin qyzmetterdiń sapasyn jaqsartýdy, memlekettik satyp alýǵa qatysýshylardyń jaýapkershiligin kúsheıtýdi jáne básekelestikti damytýdy kózdeıdi.
Zań novellasynyń birinshi blogy satyp alý rásimderin jeńildetýge jáne qysqartýǵa baǵyttalǵan
Birinshi. Shaǵymdardy qaraý tetigi jańartyldy. Qarjy mınıstrliginiń baqylaýshy organ retindegi róli qaıta qaraldy.
Satyp alýdy jedel júrgizý, tapsyrys berýshilerge zor ókilettikter berý, sondaı-aq satyp alý rásimderiniń keshiktirilýin boldyrmaý maqsatynda budan bylaı shaǵymdardy satyp alýdy uıymdastyrýshynyń ózi tikeleı qaraıdy.
Satyp alý qorytyndylaryna shaǵymdaný veb-portal arqyly jáne jeńimpazy tek konkýrstyq komıssııa aıqyndaǵan satyp alýlar boıynsha ǵana júzege asyrylady.
Ekinshi. Satyp alý rásimderin ótkizý merzimderin qysqartý maqsatynda Zańda tikeleı belgilengen merzimder Memlekettik satyp alýdy júzege asyrý qaǵıdalarynyń deńgeıine aýystyryldy.
Úshinshi. Rásimderdi ońaılatý jáne sybaılas jemqorlyq táýekelderin boldyrmaý úshin memlekettik satyp alýdy ótpedi dep taný negizderi qaıta qaraldy.
Buryn satyp alýlar tek 1 áleýetti ónim berýshi qatysqan jaǵdaıda ótpedi dep tanylatyn. Endi mundaı ónim berýshini tıisti biliktilik talaptaryna saı dep tanyǵan jaǵdaıda onymen shart jasasýǵa ruqsat beriledi.
Tórtinshi. Tapsyrys berýshilerdiń taýarlardy, jumystar men kórsetiletin qyzmetterdi jedel satyp alýyna ońtaıly jaǵdaı jasaý jáne olarǵa barynsha derbestik berý maqsatynda quny 100 AEK-ke deıingi taýarlardy, 500 AEK-ke deıingi jumystar men qyzmetterdi bir kózden satyp alý quqyǵy qarastyrylǵan.
Aýyl ákimdikteri úshin mundaı taýarlardy, jumystar men kórsetiletin qyzmetterdi satyp alý shegi 3000-nan 4000 AEK-ke deıin ulǵaıtyldy.
Sondaı-aq tótenshe jaǵdaılardyń aldyn alýǵa qajetti taýarlardy, jumystar men kórsetiletin qyzmetterdi bir kózden satyp alý múmkindigi bekitildi (ázirge tek tótenshe jaǵdaı saldaryn joıý úshin).
Besinshi. Ǵylymı uıymdardyń satyp alý tártibi jeńildetildi.
Máselen, ǵylymı zertteýler men ǵylymı jumystardy oryndaý úshin ǵylymı-zertteý ınstıtýttary men joǵary jáne (nemese) joǵary oqý ornynan keıingi bilim berý uıymdarynyń satyp alý rásimderi endi Ǵylym jáne joǵary bilim mınıstrligi bekitetin qaǵıdalar boıynsha júzege asyrylady.
Zań novellasynyń ekinshi blogy satyp alynatyn taýarlardyń, jumystar men kórsetiletin qyzmetterdiń sapasyn arttyrýǵa baǵyttalǵan
Birinshi. Satyp alýǵa qatysýshylardyń biliktiligin arttyrý jáne ónim berýshini tańdaýdyń baǵalyq emes ólshem sharttaryn damytý úshin áleýetti ónim berýshilerdiń tizilimi engizildi. Bul abyroıyna nuqsan kelmegen ónim berýshiler arasynda satyp alýdy júzege asyrýǵa jáne satyp alýdyń barlyq túri boıynsha baǵa men sapa ólshemsharttaryn biriktire otyryp, ónim berýshilerdi durys tańdaýǵa múmkindik beredi.
Bul rette ónim berýshi týraly aqparat memlekettik organdar júıeleriniń málimetteri negizinde túziledi (jumys tájirıbesi, qarjylyq ornyqtylyǵy, salyq beresheginiń bolmaýy, ashyq qoljetimdilikte qarjylyq esebiniń jarııalanýy jáne t. b.).
Ekinshi. Zańda tolyq daıyn túrinde beriletin qurylys týraly shart jasasý múmkindigi, ıaǵnı jobalaýdan bastap obektini paıdalanýǵa berýge deıingi jobany júzege asyrýdyń barlyq kezeńi, sondaı-aq kórsetilgen jumystarǵa ilespe taýarlar jetkizý jáne qyzmetter kórsetý úshin jaýapkershilikti bir ónim berýshige júkteý múmkindigi belgilengen.
Úshinshi. Áleýmettik, ekonomıkalyq jáne ekologııalyq aspektilerdi eskere otyryp, taýarlar, jumystar men kórsetiletin qyzmetterdi satyp alýǵa negizdelgen «turaqty memlekettik satyp alýlar» túsinigi engizildi.
Zań novellasynyń úshinshi blogy ónim berýshilerdiń jaýapkershiligin arttyrýǵa baǵyttalǵan
Birinshi. Memlekettik satyp alýlarǵa qoǵamdyq baqylaý júrgizý múmkindigi engizildi.
Ekinshi. Buryn sybaılas jemqorlyqpen baılanysty quqyq buzýshylyq jasaǵan áleýetti ónim berýshiniń, basshynyń nemese quryltaıshynyń memlekettik satyp alýlarǵa qatysýyna tyıym salyndy.
Jalaqy boıynsha merzimi ótken bereshegi bar áleýetti ónim berýshiler de memlekettik satyp alýlarǵa jiberilmeıdi.
Úshinshi. Ónim berýshi jumystardy oryndaý nemese qyzmetter kórsetý úshin qosalqy merdigerlerge (birlesip oryndaýshylarǵa) beretin jumystar men kórsetiletin qyzmetterdiń shekti kólemi 50-den 30 paıyzǵa deıin qysqartyldy.
Zań novellasynyń tórtinshi blogy básekelestikti damytýǵa baǵyttalǵan
Birinshi. Barlyq memlekettik jáne kvazımemlekettik uıymdardy satyp alýdyń biryńǵaı platformasyna — memlekettik satyp alýdyń veb-portalyna kóshirý múmkindigi zańnamalyq turǵyda bekitildi.
Bastapqy kezeńde qazirgi satyp alý alańdary saqtalady jáne satyp alý boıynsha egjeı-tegjeıli aqparatty jınaý jáne kórsetý úshin ıntegratsııa júrgiziledi.
Ekinshi. Taýar bırjalary arqyly satyp alý tásili alynyp tastaldy.
Úshinshi. Úkimet aıqyndaǵan naqty ónim berýshimen tikeleı shart jasasý arqyly bir kózden satyp alý endi jalpyhalyqtyq máni bar asa mańyzdy obektiler men jobalardy iske asyrý úshin qajetti erekshe jaǵdaılarda ǵana júzege asyrylady.
Tórtinshi. Otandyq taýar óndirýshilerdi qoldaý maqsatynda Qarjy mınıstrligi tek qana shaǵyn jáne orta kásipkerlik sýbektilerinen satyp alynatyn taýarlardyń, jumystar men kórsetiletin qyzmetterdiń jeke tizbesin bekitedi.
Zań 2025 jyldyń 1 qańtarynan bastap qoldanysqa engiziledi.
Zańnyń mátini baspasózde jarııalanady.