Prezıdent birqatar memlekettiń elshilerinen senim gramotalaryn qabyldady
«Aqorda» rezıdentsııasynda tórt memlekettiń jańadan taǵaıyndalǵan tótenshe jáne ókiletti elshileriniń, sondaı-aq Eýropa Odaǵy ókildigi basshysynyń Qazaqstan Prezıdentine senim gramotalaryn saltanatty túrde tapsyrý rásimi ótti.
Memleket basshysyna Frantsııa elshisi Sılvan Gıoge, Eýropa Odaǵynyń elshisi Aleshka Sımkıch, Fınlıandııa elshisi ıAnne Heıskanen, Kanada elshisi Krıstofer Daggan, Brazılııa elshisi Marsel Fortýna Bıato senim gramotalaryn tapsyrdy.
Qasym-Jomart Toqaev elshilermen júzdesý barysynda Qazaqstan beıbit dıplomatııa qaǵıdatyn ustanatyn el ekenin ári halyqaralyq arenadaǵy qaýipsizdik pen turaqtylyqty qamtamasyz etýge eleýli úles qosa alatynyn atap ótti.
Memleket basshysy elimizdiń Birikken Ulttar Uıymymen jahandyq jáne óńirlik qaýipsizdik máseleleri boıynsha tyǵyz yntymaqtastyqty jalǵastyrýǵa beıil ekenin rastady.
Qasym-Jomart Toqaev elshilerdi Qazaqstandaǵy dıplomatııalyq mıssııalarynyń resmı túrde bastalýymen quttyqtap, olardyń memleketteri basshylaryna izgi tilegin joldady.