Prezıdent «Bórte Mılka» taýarly sút fermasymen tanysty
19:02, 27 Qyrkúıek 2024
<p>TÚRKІSTAN. KAZINFORM – Memleket basshysy Ordabasy aýdanynyń Badam aýylynda ornalasqan «Bórte Mılka» JShS taýarly sút fermasyn aralap kórdi.</p>
2016 jyly negizi qalanǵan bul kásiporyn Soltústik Qazaqstan oblysynyń tájirıbesi negizinde bıyl 403 bas sıyr satyp aldy. Nátıjesinde qosymsha 15 jańa jumys orny ashyldy.
Jobaǵa memleketten jyldyq mólsherlemesi 2,5 paıyz bolatyn jeńildetilgen 2,4 mıllıard teńge nesıe berildi. Búginde qurylys jumystary tolyq aıaqtaldy. Ferma «DeLaval» shved tehnologııalyq keshenimen jabdyqtalǵan.
Ferma táýligine 25 tonna sút óńdep, 20-dan astam ónim túrin shyǵarady. Kásiporynnyń taýary negizinen Túrkistan, Qyzylorda, Jambyl oblystaryna, sondaı-aq Shymkent, Almaty qalalaryna jetkiziledi.