Prezıdent BNK Financial Group basshysy Bın De-Indi qabyldady

<p>ASTANA. KAZINFORM — Qazaqstan-Koreıa bıznes forýmy aıasynda Qasym-Jomart Toqaev BNK Financial Group kompanııasy dırektorlar keńesiniń tóraǵasy Bın De-Inmen kezdesti.</p>

Memleket basshysy kompanııanyń óz ıeligindegi BNK Finance Kazakhstan mıkroqarjy uıymyn tolyqqandy ekinshi deńgeıli bankke aınaldyrý nıetin quptady.

Onyń pikirinshe, Ońtústik Koreıadaǵy jetekshi banktiń Qazaqstanda qyzmet etýi eki el arasyndaǵy saýda-ınvestıtsııalyq yntymaqtastyqty nyǵaıtýǵa yqpal etedi.

Foto: Aqorda

Qasym-Jomart Toqaev kompanııanyń mıkroqarjy uıymyn bankke aınaldyrý rásimi aıaqtalǵan soń, korporatıvtik nesıe berýge kúsh salýǵa shaqyrdy.

Sondaı-aq bank salasynda ozyq IT-sheshimderdi paıdalanýdyń mańyzyna nazar aýdardy.

BNK Financial Group Inc. — Ońtústik Koreıanyń qarjylyq toby.

Onyń quramyna Busan Bank, Kyongnam Bank, BNK Capital jáne basqa da kompanııalar kiredi.

Foto: Aqorda

Kompanııanyń aktıvi — 129 mıllıard dollar. Al taza tabysy — 504 mıllıon dollar.

Qarjylyq top álemdegi eń iri kompanııalardy esepke alatyn Forbes Global 2000 tizimine engen.