Prezıdent BQO-ǵa eńbegi sińgen azamattarmen júzdesti

ORAL. QazAqparat - Memleket basshysy BQO-ǵa sapary barysynda mádenıet saraıynyń májilis zalynda aımaqqa eńbegi sińgen azamattarmen kezdesti, dep habarlaıdy QazAqparat.

Olardyń arasynda óńirdiń damýyna úles qosyp júrgen sala mamandary men oqys oqıǵalar kezinde belsendilik tanytyp, azamattyq úlgi kórsetken kisiler de bar.

Prezıdent óńir belsendilerimen pikir almasty. Ol búgin aımaqtyń tynys-tirshiligimen tanysyp júrgenin aıtty. Sondaı-aq Memleket basshysy Batys Qazaqstandy elimizdiń damýy úshin mańyzdy aımaq dep atap ótti.

«Oblystyń áleýeti zor. Elimizde aýqymdy jumystar atqarylyp jatyr. Osyndaı kezeńde biz úshin eń qundy nárse – beıbitshilik. Osy jolda bárimiz bir el bolyp eńbek etsek, eshqandaı kedergi bolmaıdy. Birligimiz bekem bolsa, tosqaýyldyń bárin eńseremiz», – dedi Qasym-Jomart Toqaev.

Memleket basshysy kezdesýge qatysqan ǵalymdarǵa, jastarǵa, eńbek adamdaryna qoldaý kórsetiletinin jetkizdi. Sonymen qatar Prezıdenttik jastar kadrlyq rezervi áleýmettik lıft retinde jumys isteı bastaǵanyn atap ótti.

Aıta keteıik, Prezıdentke «Atameken» óner ordasynda óńirdiń tarıhyna arnalǵan kórmede Jáńgir hannyń biregeı jádigerleri tanystyryldy.