Prezıdent bızneske bólinetin qarajattyń tıimdi jumsalýyn qatań baqylaýdy tapsyrdy

NUR-SULTAN. QazAqparat – Prezıdent Qasym-Jomart Toqaev bul mindetti Esep komıteti men Qarjy mınıstrligine tapsyrdy, dep habarlaıdy QazAqparat tilshisi.

«Tıimdi shaǵyn jáne orta bıznes - qala men aýyldy damytýdyń berik negizi. Shaǵyn, ásirese mıkrobıznes elimizdiń áleýmettik –ekonomıkalyq jáne saıası ómirinde mańyzdy ról atqarady. Atap aıtqanda, eń aldymen aýyl turǵyndaryna turaqty jumys berip, jumyssyzdyqty azaıtady. Sondaı-aq, jappaı káspikerlikti damytý – sanaǵa sińgen patronalıstik pıǵyl men masyldyqtan arylýǵa múmkindik beredi. Sondyqtan, memleket aldaǵy ýaqytta da bızneske qoldaý kórsetedi. Ulttyq qordan 100 mlrd teńgege jýyq qarjy bólindi. Biraq, sarapshylardyń pikirinshe, qarjylaı qoldaýdyń ıgiligin jergilikti bılikpen baılanysy bar sharýashylyqtar ǵana kórip otyr. Shyn máninde jańa jobalar boıynsha kompanııalar qurylyp, jumys oryndary ashylýy kerek edi. Biraq, jergilikti ákimder uıymdastyrý jumystaryn talapqa saı oryndamaǵan. Sonyń saldarynan salyq jáne zeınetaqy tólemderin arttyryp, jergilikti bıýdjetti nyǵaıtýǵa jaǵdaı jasalyp otyrǵan joq», - dedi Memleket basshysy Qazaqstan halqyna Joldaýynda. Osyǵan oraı, Prezıdent Esep komıtetine jáne Qarjy mınıstrligine qarajattyń jumsalýyn qatań baqylaýǵa alýdy tapsyrdy. «Bizde shaǵyn kásipkerlikti damytýdyń úlgi bolarlyq mysaldary jetkilikti. Mıkro jáne shaǵyn bıznes kompanııalaryn tabysqa salynatyn salyqtan úsh jylǵa bosatý týraly Úkimetke zańdy negiz qurýdy tapsyramyn», - dedi ol.