Prezıdent bıznes-klımatty jaqsartý máselesine basa nazar aýdarýda - Lázzát Rysbekova
«COVID-19 indeti bıznes salasyn qatty turalatyp ketti. Týrızm, qoǵamdyq tamaqtaný, saýda, qyzmet kórsetý jáne basqa da salalar úlken shyǵyndarǵa ushyrap otyr. Osyǵan oraı Prezıdent halyqqa Joldaýynda bıznesti aıaǵynan turǵyzý, bıznes-klımatty jaqsartý jáne ony retteý men qadaǵalaý saıasatyn ózgertý máselelerin kóterdi. Memleket basshysy shaǵyn jáne orta bıznes qıyn kezeńde basynan ótkerýde, olar pandemııanyń negizgi soqqysyn qabyldady dedi. Sondyqtan memleket óz tarapynan kásipkerlerdi qoldaý sharalaryn qolǵa aldy. Nátıjesinde 700 myńnan astam kásipkerge salyq jeńildikteri berildi. Shaǵyn jáne orta bıznes úshin eńbekaqy qoryna túsetin aýyrtpalyqty azaıtý týraly tapsyrma berildi. Mundaı jeńildik jyl sońyna deıin jalǵasatyn bolady», - dedi senator.
Sonymen qatar depýtat Prezıdent bıznes-klımatty jaqsartý máselesine de nazar aýdarǵanyn eske saldy.
«Retteý men baqylaý saıasatynyń bazalyq qaǵıdalarynyń ózgerýi qajet jáne bul azamattardyń densaýlyǵy men ekologııany qorǵaý maqsatynda qoldanylsa ǵana oryndy bolatyndyǵyn» aıtty. Búginde Reseı Federatsııasy «regýlıatornaıa gılotına» dep atalatyn saıasatty júrgizýde. Onyń mánisi bıznestiń qyzmetine kedergi keltiretin zań normalaryn anyqtap, azaıtý jáne sol arqyly bıznestiń damýyna jol ashý bolyp sanalady. Meniń oıymsha, Qazaqstan da retteý men baqylaý baǵytyndaǵy zańnamalarǵa taldaý jasap, eskirgen normalardy joıýy qajet dep esepteımin. Mine Memleket basshysy da bızneske jasalǵan úshjyldyq moratorııdi paıdalana otyryp, baqylaý tetikterin jańalaýdy tapsyrdy. Bul bıznestiń ekinshi tynysyn ashady degen senim mol», - dedi Lázzát Rysbekova.