Prezıdent: Biz úshin negizgi basym baǵyt – halyqtyń ál-aýqatyn arttyrý

ASTANA. QazAqparat – Biz úshin negizgi basym baǵyt – halyqtyń ál-aýqatyn arttyrý. Bul basymdyq eshqashan ózgermeıdi. Kezekten tys prezıdent saılaýynda Qasym-Jomart Toqaevtyń kandıdatýrasyn qoldaý jónindegi halyqtyq koalıtsııa forýmynda sóz sóılegen Memleket basshysy osylaı aıtty, dep habarlaıdy QazAqparat tilshisi.

«Biz ekonomıkany sapaly damytyp, azamattardyń ómir súrý deńgeıin arttyrý máselelerimen aınalystyq. Shaǵyn jáne orta bızneske qolaıly jaǵdaılar jasalyp jatyr jáne bul jumys jalǵasady. Aýyl sharýashylyǵynyń áleýetin kúsheıtý úshin júıeli sharalar qabyldanyp jatyr.

Biz úshin negizgi basym baǵyt – halyqtyń ál-aýqatyn arttyrý. Bul basymdyq eshqashan ózgermeıdi. Meniń tapsyrmam boıynsha dárigerler men pedagogterdiń, bıýdjettik sala qyzmetkerleriniń jalaqysy ulǵaıtyldy. Zeınetaqylardyń, stıpendııalar men járdemaqylardyń turaqty ósýi qamtamasyz etildi. Zeınetaqy jınaqtarynyń bir bóligin merziminen buryn alý esebinen bir jarym mıllıonnan astam otandasymyz turǵyn úı jaǵdaıyn jaqsartyp, emdele aldy», - dedi Prezıdent.

Memleket basshysy qańtar aıynda muqtaj jandarǵa naqty kómek kórsetýmen aınalysatyn «Qazaqstan halqyna» qory qurylǵanyn eske saldy.

«Konstıtýtsııaǵa jer men onyń qoınaýy halyqqa tıesili degen norma engizildi. Bul ádemi uran ǵana emes. «Ulttyq qor – balalarǵa!» baǵdarlamasy Ata Zańǵa engizilgen túzetýdiń iske asa bastaǵanyn kórsetip tur. Buryn-sońdy bolmaǵan bul shara ulttyq baılyqty ádil bólýge baǵyttalǵan», - dedi Qasym-Jomart Toqaev.