Prezıdent bilim men ǵylymǵa negizgi basymdyq berip otyr – Memlekettik keńesshi
Memlekettik keńesshi óz baıandamasynda 2019 jyldan 2022 jylǵa deıin saıası reformalardyń 4 paketi júzege asqanyn atap ótti.
«Osy reformalardyń aıasynda sol úsh jyl ishinde 20 zań qabyldandy. Prezıdent byltyrǵy naýryz aıyndaǵy Joldaýynda aýqymdy saıası jańǵyrý baǵdarlamasyn júzege asyrý jóninde bastama kóterdi. Bul bastamalar Konstıtýtsııalyq reformalardyń negizin qalady. Ózderińiz biletindeı, Konstıtýtsııamyzdaǵy 98 baptyń 33-ine, 9 bólimniń 8-ine túzetý engizildi. Ata zańymyzdyń úshten biri ózgerdi. Budan keıin 7 Konstıtýtsııalyq zańǵa, 15 Kodekske jáne 29 Zańǵa túzetýler engizildi. Munyń bári bılik tarmaqtary arasynda tepe-teńdikti saqtaıtyn memlekettik saıasat qurýdyń jańa modelin qalyptastyrdy», - dedi ol.
Sondaı-aq, ol Túrkistandaǵy ulttyq quryltaıda jańa qundylyqtar qalyptastyrý úrdisine basa mán berilgenin atap ótti.
«Prezıdent ulttyń jańa sapasyn qalyptastyrý úshin bilim, mádenıet, ǵylym salalaryn damytý qajettigin atap ótti. Bul bizdiń qoǵamnyń damýyndaǵy negizgi úsh deńgeıi bolýǵa tıis. Memleket basshysynyń Túrkistandaǵy sóılegen sóziniń basty ereksheligi de osynda. Ádette biz mádenıet, ǵylym-bilim jaıynda ekinshi nemese úshinshi kezekte ǵana aıtamyz. Prezıdent kerisinshe bul salarǵa erekshe basymdyq berip otyr. Ol aımaqtardaǵy mádenıet oshaqtaryn, aýyl mektepterin, balalar kitaphanalaryn, kitap shyǵarý isin, teatr men kınony, murajaı jumysyn damytýǵa basa nazar aýdardy. Adal azamattardyń qalyptastyrý janashyrlyq, meıirim, tilektestik sııaqty qundylyqtardy sanaǵan sińirýden bastalady», - dedi Erlan Qarın.