Prezıdent belgili memleket qaıratkeri Ikram Adyrbekovti qabyldady

<p>ASTANA. KAZINFORM &mdash; Prezıdent Qasym-Jomart Toqaev memleket qaıratkeri, dıplomat, Túrki memleketteri uıymy Aqsaqaldar keńesiniń múshesi Ikram Adyrbekovti qabyldady, dep habarlady Aqorda.&nbsp;</p>

Kezdesý barysynda byltyr qarasha aıynda ótken Túrki memleketteri uıymynyń X cammıtinde Qazaqstan tarapy Uıymnyń qazirgi tóraǵasy retinde usynǵan «Túrki dáýiri!» («TURKTIME!») baǵdarlamasynyń basty baǵyttaryn júzege asyrý máseleleri talqylandy.

Qasym-Jomart Toqaev túrki tildes memleketterdiń mádenı, rýhanı, tarıhı, saıası-ekonomıkalyq salalardaǵy baılanystaryn nyǵaıtý qajet ekenin aıtty. Bul rette Memleket basshysy ýnıversıtetterdiń fılıalyn ashý, birlesken ǵylymı zertteýler júrgizý, ortaq qundylyqtardy dáripteý, sonymen qatar qarjy, jasandy ıntellekt, IT jáne aeroǵarysh ónerkásibi sekildi ekonomıkanyń basym baǵyttary boıynsha birlesken jobalardy júzege asyrý jumystaryna basa nazar aýdarý kerektigin atap ótti.

Ikram Adyrbekov Túrkistan qalasyn túrki áleminiń rýhanı astanasy, búkil túrki halyqtaryna ortaq tarıhı shahar retinde damytý úshin atqarylýǵa tıis sharalar týraly oı-pikirimen bólisti.

Prezıdent Túrki memleketteri uıymynyń Aqsaqaldar keńesi baýyrlas halyqtardyń ózara yqpaldastyǵyn arttyrýǵa eleýli úles qosatynyna senim bildirdi.