Prezıdent Bayer AG halyqaralyq kontserniniń basqarma múshesimen kezdesti

<p>Bayer AG kompanııasynyń basqarma múshesi, farmatsevtıka baǵytynyń basshysy Shtefan Olrıhpen kezdesý barysynda densaýlyq saqtaý, ornyqty eginshilik jáne ǵylymı zertteýler salalaryndaǵy yntymaqtastyq perspektıvalary talqylandy, dep habarlaıy QazAqparat Aqordanyń baspasóz qyzmetine silteme jasap.</p>

Memleket basshysy Bayer kompanııasynyń zamanaýı medıtsınalyq ónimderine qol jetkizýge, sondaı-aq zerthanalar ashýǵa jáne birlesken ǵylymı-zertteý jobalaryn júzege asyrýǵa Qazaqstannyń zor qyzyǵýshylyq tanytyp otyrǵanyna nazar aýdardy.

Bayer AG – densaýlyq saqtaý jáne aýyl sharýashylyǵy salalaryna arnalǵan medıtsınalyq-bıologııalyq sheshimder ázirleýge mamandanǵan halyqaralyq kontsern.

Qasym-Jomart Toqaev Qazaqstannyń bıotehnologııalyq klasterdi damytý jumystaryn belsendi júrgizip jatqanyn atap ótti. Sondaı-aq atalǵan baǵyttarda ázirlemeler daıyndap, óndiriske engizý úshin QazBioPharm ulttyq bıofarmatsevtıkalyq holdıngi qurylǵany jóninde aıtty.

Sonymen qatar kezdesýde Qazaqstanǵa jańa dárilik zattar ákelý rásimderin jeńildetý úshin naqty sharalar qabyldaý máselesi talqylandy.

Memleket basshysy elimizdiń aýyl sharýashylyǵynda qoldanylatyn tyńaıtqyshtar, pestıtsıdter jáne basqa da bıohımııalyq zattar óndirý úshin kásiporyn ashý aıryqsha mańyzǵa ıe ekenine nazar aýdardy. Prezıdenttiń pikirinshe, selektsııa, gendik ınjenerııa salalaryndaǵy ǵylymı jáne iskerlik baılanystardy damytýǵa mol áleýet bar.