Prezıdent Batys Qazaqstan oblysynyń sý basqan aýmaqtaryn tikushaqpen aralady
Qasym-Jomart Toqaev Terekti, Syrym jáne Qaratóbe aýdandaryndaǵy qalyptasqan jaǵdaımen tanysty.
«Oblys ákimi Narıman Tóreǵalıev Prezıdentke búginde 6 aýdan men Oral qalasyn sý basqanyn baıandady. Qarǵyn sý 552 turǵyn úıge, 427 saıajaı telimine zııan keltirgen. Óńir basshysynyń aıtýynsha, sý tasqynyna qarsy sharalarǵa 1911 adam, 332 tehnıka, 101 motopompa, 1 tikushaq jumyldyrylǵan. Sonymen qatar qutqarý jumystaryna Almaty jáne Mańǵystaý oblystarynyń qutqarýshylary atsalysyp jatyr. Qarǵyn sý basqan aýmaqtardan 7 myńǵa jýyq turǵyn kóshirilgen, jedel-evakýatsııalaý pýnktteri qurylǵan. Zardap shekkenderge birjolǵy materıaldyq kómek kórsetý úshin jergilikti bıýdjet esebinen 63 mıllıon teńge qarjy bólindi. Sý aıdaý, nysandardyń jan-jaǵyn topyraqpen qorshaý jáne sý júretin qubyrlardy keńeıtý jumystary júrgizilip jatyr» - delingen habarlamada.
Eske sala keteıik, búgin memleket basshysy Qasym-Jomart Toqaev Batys Qazaqstan oblysyna jumys saparymen bardy.
Oǵan deıin Prezıdent Qasym-Jomart Toqaev elimizdiń birqatar óńirinde bolǵan sý tasqyny saldarynan týyndaǵan tótenshe jaǵdaıǵa baılanysty shuǵyl keńes ótkizdi.
Memleket basshysy jaǵdaıdy qalypqa keltirý úshin shuǵyl sharalar qabyldaýmen qatar, júıeli jumys qajet ekenin atap ótti.
Sondaı-aq Prezıdent Qasym-Jomart Toqaevtyń tóraǵalyǵymen Sý tasqynyna qarsy sharalardy úılestirý jáne qarǵyn sý júrý kezeńiniń saldaryn joıý jónindegi respýblıkalyq shtabtyń otyrysy ótti.