Prezıdent Bas prokýror Berik Asylovty qabyldady
Qasym-Jomart Toqaevqa elimizdegi krımınogendik ahýal jáne qylmystyq-quqyqtyq salada azamattardyń konstıtýtsııalyq quqyqtarynyń saqtalýy jóninde málimet berildi. Prokýrorlar tergeý oryndary zańsyz qamaýǵa alǵan 449 adamdy bosatty. Sondaı-aq 515 adamǵa qatysty shyqqan úkimdi qaıta qaraý jóninde bastama kóterdi. Onyń ishinde 205 sottalýshynyń jaǵdaıy jaqsaryp, 10 adam aqtaldy.
Budan bólek, Memleket basshysyna aktıvterdi qaıtarý jáne qylmyskerlerdi izdestirý jumystary barysynda prokýratýra organdarynyń jasandy ıntellektini paıdalanýy jóninde baıandaldy. Bas prokýratýrada elden zańsyz shyǵarylǵan aktıvterdi izdeý jáne izine túsý úshin qoldanylatyn «aqyldy» analıtıkalyq platformany pılottyq rejımde synap kórý jumystary bastaldy.
Qazirgi tańda qabyldanǵan sharalardyń, sonyń ishinde aqparattyq júıelerdi paıdalanýdyń nátıjesinde izdeýde júrgen 605 qylmysker ustaldy.
Sonymen qatar búginde prokýrorlar júzege asyrylyp jatqan 663 ınvestıtsııalyq jobaǵa quqyqtyq keńes berip otyr. Bıyl el ekonomıkasyna 2,4 trıllıon teńge kóleminde ınvestıtsııa salǵan 148 ınvestordyń túıtkildi máselesi sheshildi.
Prezıdent shetelge zańsyz shyǵarylǵan aktıvterdi izdeýge jáne qaıtarý úshin zamanaýı tehnologııalardy keńinen qoldaný isin jalǵastyrýdy tapsyrdy. Memleket basshysy qylmystyq protseste azamattardyń konstıtýtsııalyq quqyqtaryn qorǵaýdyń jáne ınvestorlar men bıznes-qoǵamdastyqtyń quqyqtaryn prokýrorlyq qadaǵalaý sharalarymen tıimdi qamtamasyz etýdiń mańyzdy ekenin atap ótti.