Prezıdent balalardy Jańa jyl merekesimen quttyqtady
Shyrshaǵa shaqyrylǵan balalarǵa Memleket basshysy Qasym-Jomart Toqaevtyń atynan quttyqtaý hat tabys etildi.
«Aınalaıyn balaqaı! Seni Jańa jyl merekesimen quttyqtaımyn! Osy tamasha meıram ózińdi qýanysh pen shattyqqa bólesin! Ómiriń jarqyn sátterge toly bolsyn! Kitap oqy, sportpen shuǵyldan, tabıǵatty aıala jáne jaqsylyq jasaýǵa umtyl! Bilimpaz, eńbekqor, adal azamat bol! Asqaq armandaryń aqıqatqa aınalsyn! Saǵan zor densaýlyq, tolaǵaı tabys tileımin!», - dep jazdy Prezıdent balalarǵa arnalǵan quttyqtaýynda.
Balalarmen birge shyrsha shamyn jaǵýǵa QR Oqý-aǵartý mınıstri Ǵanı Beısembaev qatysty.
«Búgin ózderińiz syndy 6 mıllıonnan astam bala Jańa jyl merekesin toılaýda jáne respýblıkamyzdyń 20 óńirinen júzdegen bala osy Prezıdent shyrshasyna qatysyp, úlken merekeli toıdy birge ótkizýdemiz. Jalpy sizder osy úsh kún boıy ásem qalamyz Astananyń eń kórikti jerlerin araladyńyzdar. Onyń ishinde táýelsizdik sımvolyna aınalǵan Báıterekke de bardy dep estip otyrmyn. Memleket sizderdiń baqytty balalyq shaqty ótkizýlerińiz úshin aıanbaı barlyq múmkindikterdi jasap jatyr. Endigi jerde, qurmetti jas dostar, sizder de sabaqtaryńyzdy beske oqyp, sanaly tárbıe alyp, osy eldiń bedeldi, myqty azamaty bolyp ósýlerińizge barlyq maqsat-murattaryńyzdy arnaýǵa tıissizder», - dedi Oqý-aǵartý mınıstri.
Sonymen birge, Ǵanı Beısembaev balalarǵa Prezıdent Qasym-Jomart Toqaev atynan syılyqtardy tabys etti. Rıýkzak ishinde Prezıdenttiń quttyqtaý ashyqhaty, planshet, táttiler jáne entsıklopedııalyq kitaptar bar.
Shyrsha saltanatyna qatysýshylardyń ishinde on jasar Káýsar Almasqyzy da bar. Jetisý oblysy Taldyqorǵan qalasyndaǵy №19 mektep-gımnazııasynyń 5-synyp oqýshysy bul shara úshin arnaıy óz qolymen 100 raýshan gúlinen sándi kóılek tigipti.
Otbasy úlgisindegi balalardy qoldaý ortalyǵynyń tárıelenýshisi, Mańǵystaý oblysynan kelgen Vıktor Baıarkın Prezıdentten shaqyrtý alǵany úshin alǵysyn bildirdi. Úshinshi synyp oqýshysy karatemen aınalysady jáne dombyrada oınaıdy.
«Shyrsha toıyna qatysqanym úshin asa qýanyshtymyn. Onyń ústine bizge kóptegen syılyqtar berildi. Osyndaı sheksiz qýanysh syılaǵan Prezıdentke jáne barsha qatysýshylarǵa rahmet aıtamyn», - deıdi ol.
Balalarǵa elordanyń úzdik shyǵarmashylyq ujymdaryǵ Marjan Arapbaeva, Qaraqat Ábildına, Erjan Maksım syndy tanymal ánshiler óner kórsetti. «Astana Opera» memlekettik opera jáne balet teatrynyń solısteri «Kúlbıkesh» spektakliniń qoıylymyn tartý etti.
Eske sala keteıik, buǵan deıin Oqý-aǵartý mınıstrligi jańa jyl merekesine kelgen qatysýshylar úshin Astana qalasy boıynsha ekskýrsııa ótkizgen bolatyn. Balalar elordanyń eń tanymal oryndaryna bardy.