Prezıdent aıtqan 162 olıgarhtyń sany 2 jyl ishinde qalaı ózgerdi – vıtse-mınıstr jaýaby

<p>Qarjy vıtse-mınıstri Erjan Birjanov 2025 jyly kúshine enetin Salyq kodeksin talqylaǵan jıynda Qazaqstandaǵy baılyqtyń teń jartysyn ıemdenip otyr delinetin 162 adamnyń tizimi týraly pikir bildirdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Qańtar oqıǵasynan keıin prezıdent Q.Toqaev eldegi baılyqtyń teń jartysyn 162 adam ıemdenip otyrǵanyn aıtqan edi. Sodan bergi eki jylda 162 adamnyń tizimi qysqardy ma, uzardy ma? Olardyń ıeligindegi baılyqtyń úlesi 50 paıyzdan tómendedi me, álde asyp ketti me?» - dep surady jýrnalıst.

Vıtse-mınıstrdiń sózinshe, ol tizim qupııa bolǵandyqtan, naqty málimet berý qıyn.

«Qańtar oqıǵasynan keıin sondaı aqparat bolǵan edi. Qazirgi tańda bul jumysty zańdy deńgeıge jetkizý úshin zańsyz ıemdelgen aktıvterdi qaıtarý týraly zań qabyldandy, Bas prokýratýrada arnaıy komıtet quryldy. Biz sol komıtet aıasynda jumys tobyna kiremiz, birge jumys atqarylyp jatyr. 11 aıdyń qorytyndysy boıynsha 1 trln teńgedeı qaıtarylǵanyn bilesizder. Bul jumysty zańdy deńgeıde jalǵastyrý úshin qoǵamdyq uıym ókilderi bar arnaıy jumys toby qurylǵan. Tizimniń qalaı qalyptasatynyn, basqa da máselelerdi Úkimet basshysymen birge udaıy qarap otyrady. Qazirgi tańda bul jumysty Bas prokýratýra qadaǵalap otyrady. Degenmen salyq jáne kedendik tekserý kezinde bolǵan zańsyzdyqtar boıynsha aqparat berý arqyly kómek kórsetip jatyrmyz», - dedi Qarjy mınıstriniń orynbasary.

Erjan Birjanov atalǵan 162 adamnyń tizimin kórýge quzyreti joq ekenin atap ótti.

«Ol tizimde 162 adam bar ma, 200 adam bar ma, ol jaǵy jarııa etilgen joq. Ózińiz bilesiz onyń sebepteri bar. Bas prokýratýra túsinikteme bergen. Sebebi qazir bul azamattar úlken mekemelerdiń quryltaıshylary nemese basshylary bolyp keledi. Qazir olardy jarııa etetin bolsa, repýtatsııalyq qaterler bar. Onyń ústine ıeligindegi somany dáleldep, óndirip alǵany týraly sońǵy derekter joq. Sondyqtan Bas prokýratýranyń sheńberinde tizim qurylyp, qarajat qaıtarý jumystary júrgiziledi. Biz bul jumysta basty róldi atqarmaımyz. Meniń ol derekke qolym jetkilikti emes. Sebebi tek jumys tobyna kiretin adamdar ǵana ony qarastyryp otyr. Sondyqtan naqty málimet bere almaımyn. Jalpy ol tizimdi jarııa etýge zań sheńberinde múmkindik joq», - dedi Erjan Birjanov.