Prezıdent aýyldan kóshkenderdi iri qalalarǵa qalaı ornalastyrý kerektigin aıtyp berdi
Prezıdent óz Joldaýynda halyqtyń kóbi endigi kezekte iri qalalarǵa tartylatynyn atap ótti. Elbasynyń aıtýynsha, álemdik JІÓ-niń 70 paıyzy iri megapolısterge tıesili.
«18 mıllıon halqy bar elimizde mıllıon halqy bar úsh qala paıda boldy. Olardyń ekeýi bizdiń Táýelsizdik jyldarynda paıda boldy. Bul úlken jetistik. Ýrbanızatsııanyń yntasyn eshkim toqtata almaıdy. Mine, sondyqtan bul máseleni qalaı retke keltirý kerektigin oılaý kerek. Maǵan qala ishindegi jerlerdi berip, sol jerge qurylys júrgizýdi usynady. Al qalalardyń ishinde bos jer joq. Bul bólek suraq. Kezinde bıligi bar adamdar alyp-alyp alǵan da, óziniń de, ózgeniń de paıdasyna jarata almaı otyr», - dedi Prezıdent.
Memleket basshysy qala ishindegi paıdalanylmaǵan jerlerdi qaıtarý úshin prokýratýraǵa tapsyrma bergenin aıtty.
«Keńes kezinen bizge monoqalalar qaldy. Bári de kishi qalalar. Qazir kishi qalalar men kentterge úlken aýqymdy qarajat jumsaý tıimsiz. Bizge ne isteý kerek? Astana men Almaty sekildi qalalar qazirdiń ózinde JІÓ-niń 30 paıyzyn berip otyr. Osy eki qalada bilim de, ǵylym da, úzdik mamandar da bar. Sondyqtan, Úkimetke iri qalalarǵa qonystanyp jatqandarǵa kópqabatty úılerdi turǵyzýdy negizge alý kerek. Olardy biz belgili bir sharttar boıynsha sol jerge qabyldaımyz. Bolmasa otbasylyq jataqhana salýǵa bolady. Aýyldan halyqtyń kóshýin qoldap otyrǵanym joq. Biraq, ol jerde eshkimdi ustap ta tura almaıdy», - dedi Prezıdent.