Prezıdent aýyl sharýashylyǵyn tehnologııalyq turǵydan qaıta jabdyqtaýǵa qatysty tapsyrma berdi

NUR-SULTAN. QazAqparat – Agroónerkásip kesheni qoldanatyn tehnologııanyń shamamen 90 paıyzy ábden eskirdi. Bul týraly Memleket basshysy Qasym-Jomart Toqaev Qazaqstan halqyna arnalǵan Joldaýyn jarııalaý kezinde málim etti, dep habarlaıdy QazAqparat.

«Aýyl sharýashylyǵyn tehnologııalyq turǵydan qaıta jabdyqtaýdy qoldaý tásilderin muqııat qaraýymyz qajet. Agroónerkásip kesheni qoldanatyn tehnolonııanyń shamamen 90 paıyzy ábden eskirdi. Ony jańartý kerek. Aýyl sharýashylyǵyn sýbsıdııalaý saıasatyn ónerkásip salasyndaǵy memlekettik saıasatpen ushtastyrǵan jón», - dedi Memleket basshysy.

Osy oraıda Prezıdent Úkimet pen «Báıterek» holdıngine osy másele boıynsha usynystar ázirleýdi tapsyrdy.

«Jalpy, aýyl sharýashylyǵy salasynyń basty mindeti – elimizdi negizgi azyq-túlik ónimimen tolyq qamtamasyz etý. Men bıyl aýyl sharýashylyǵy jerlerin sheteldikterge jáne olardyń qatysy bar kompanııalarǵa satýǵa ári jalǵa berýge birjola tyıym salǵan zańǵa qol qoıdym. Jer kodeksine qazaqstandyq ınvestorlardy aýyl- aımaqtardy damytý úshin qarjy salýǵa yntalandyratyn túzetýler engizildi. Bul ózgerister aýyl sharýashylyǵy jerlerin tolyq ekonomıkalyq aınalymǵa túsirýge múmkindik beredi. Shyn máninde osy sheshimderdiń barlyǵy agroónerkásip sektoryna oń yqpal etedi. Sonyń arqasynda aýyl sharýashylyǵy ulttyq ekonomıkanyń negizgi qozǵaýshy kúshine aınalady dep senemin», - dedi Q. Toqaev.