Prezıdent aýyl sharýashylyǵy taýarlary men qurylys materıaldaryn óndirýshilerdiń kórmesine bardy
Kórmege agrarlyq sala boıynsha et, qus, sút jáne balyq ónimderin óńdeý kásiporyndarynyń, sondaı-aq shyryn, sýsyn óndirýshilerdiń, kókónis jáne jemis óńdeýshilerdiń taýarlary qoıyldy.
Memleket basshysy sharýalarmen áńgimelesý barysynda óńirdiń klımattyq jaǵdaıy men megapolıske jaqyn ornalasýy bul salaǵa ınvestorlar tartýǵa zor múmkindik beretinin atap ótti.
Prezıdenttiń aıtýynsha, óńirde erekshe baǵyt – túıe sharýashylyǵy qarqyndy damyp keledi jáne atalǵan sala eksport úshin zor áleýetke ıe.
– Aýyl sharýashylyǵy óndirisine jańa tehnologııalardy engizý, ekologııalyq taza ónim shyǵarý mańyzdy, – dedi Qasym-Jomart Toqaev.
Prezıdentke otandyq qurylys materıaldarynyń kóptegen túri kórsetildi.
Qazaqstanda ónerkásiptik jáne azamattyq nysandar qurylysynyń tolyq tsıklin qamtamasyz etetin taýarlar óndiriledi.
Atap aıtqanda:
– kóldeneń jelimdelgen aǵash, qurama temirbeton jáne beton qurylǵylary, avtoklavty gazobloktar, talshyqty tsement plıtalary men shyny maqta, qurǵaq qurylys qospalary men árleý materıaldary, boıaýlar men jabyndylar, alıýmınıı profılderi, panelder, dıodty shamdar, esik tutqalary jáne basqa da ónimder shyǵarylady.
Memleket basshysy qurylys salasynyń jaı-kúıi týraly aıta kele, atalǵan salany ekonomıkany damytýdyń qozǵaýshy kúshi retinde atap ótti.
– Qazir qurylys salasy boıynsha óńirdiń aldynda aýqymdy mindetter tur. Atap aıtqanda, oblys ortalyǵynyń qurylysy jáne G4 City jobasy. Bul jumysta jergilikti ónim óndirýshilerdiń qurylys materıaldarynyń áleýetin barynsha paıdalaný mańyzdy. Memleket otandyq ónim óndirýshilerdi qoldaıdy. Bul týraly men óz Joldaýymda naqty aıttym, – dedi Qasym-Jomart Toqaev.
Kórmege 20-dan astam qazaqstandyq taýar óndirýshilerdiń, sonyń ishinde «Shın-Laın» JShS, Dinara Group agroholdıngi, «Dáýlet-Beket» JShS, «PK Altyn Taǵa» JShS, «Fırma-Bent» JShS, «Knaýf Gıps Qapshaǵaı» JShS jáne basqa da iri kompanııalardyń ónimderi qoıyldy.