Prezıdent Atyraýdyń ınfraqurylymyn jaqsartyp, aýyz sý máselesin sheshýdi tapsyrdy
Prezıdenttiń paıymynsha, avtokólik joldarynyń sapasy halyqtyń turmysyna jáne ekonomıkaǵa tikeleı áser etedi. Bul sala Atyraý oblysynda aqsap tur. Jergilikti joldardyń 72 paıyzy ǵana ortasha kúıde. Muny tómen kórsetkish deýge bolady.
«Oblystaǵy respýblıkalyq mańyzy bar joldardyń sapasy da jaqsy emes. Atyraý – Astrahan kúre jolyn jóndeý jumystary baıaý júrip jatyr. Úkimet ony ýaqytyly jáne sapaly aıaqtaýdy qamtamasyz etýge tıis.
Jalpy, oblystaǵy shurq tesik joldar talaı ret jurttyń synyna ushyrady. Biraq sodan eshqandaı nátıje joq, tıisti mekemeler óz jumysyn durys oryndamaıdy. Aýdanaralyq, oblysaralyq joldardyń sapasy jaqsarmasa, aımaqtardy damytý týraly aıtýdyń ózi qıyn. Sondyqtan, jol qurylysy meniń jeke baqylaýymda bolady», - dedi Qasym-Jomart Toqaev.
Memleket basshysy budan bólek, jol boıyndaǵy ınfraqurylymdy damytýǵa basa mán bergen jón ekenin alǵa tartty. Ulttyq munaı-hımııa kesheniniń alǵashqy kezeńi iske qosylǵanda Atyraý – Dossor jolyndaǵy kólik qozǵalysy kúrt kóbeıedi. Sondyqtan, quzyrly organdar bul joldy ІІІ sanattan І sanatqa aýystyrý máselesin tez arada sheshýge tıis.
»Atyraý aımaǵyndaǵy aýyldar bir ortalyqtan beriletin sý júıesine qosylmaǵan. Kóptegen eldi mekenniń turǵyndary taza sýdy keıde belgili bir ýaqytta ǵana alady. Infraqurylym jelisi ábden tozǵandyqtan, osyndaı ahýal qalyptasyp otyr. Mysaly, Atyraýdy jáne Maqat aýdanyn sýmen qamtamasyz etetin tazartý júıesi apatty jaǵdaıda tur. Aldaǵy bes jylda tuşy sý tapshylyǵy 40 paıyzǵa jetýi múmkin. Sondyqtan, Úkimet pen oblys ákimdigi sýmen qamtamasyz etý júıesin jańǵyrtýǵa basa nazar aýdarýy qajet», - dedi Prezıdent.