Prezıdent Astananyń jylý ınfraqurylymy problemadan arylmaı kele jatqanyn synady

ASTANA. QazAqparat – Memleket basshysy Qasym-Jomart Toqaev elordany damytý máseleleri jónindegi keńes otyrysynda keıingi 10 jylda qalanyń jylý ınfraqurylymy problemadan aryla almaı kele jatqanyn synady, dep habarlaıdy QazAqparat tilshisi.

«Astananyń ınfraqurylymyn dáıekti túrde damyta berý qajet. Ýrbanızatsııanyń qazirgi qarqyny saqtalsa, elorda halqy 2030 jylǵa qaraı eki mıllıon adamǵa jetýi múmkin. Qala tez ósip keledi, bul búginde Bas jospardyń kóptegen talaptary júıeli túrde buzylyp jatyr. Sondyqtan ınjenerlik ınfraqurylymdy keshendi damytý basym mindet bolyp tur», - dedi Memleket basshysy.

Prezıdent keıingi 10 jylda Astananyń jylý ınfraqurylym problemadan arylmaı kele jatqanyn synady.

«Ákimdik 10 jyldan astam ýaqyt boıy №3 jylý-elektr ortalyǵyn paıdalanýǵa bere almaı keledi. Jobany tapsyrý merzimi birneshe ret aýystyryldy. Bul onyń qunynyń 53 mıllıard teńgege qymbattaýyna ákeldi. Másele 2019 jyly kóterilgenimen, nysannyń daıyndyǵy áli de 83% bolyp otyr», - dedi Qasym-Jomart Toqaev.

Memleket bashysynyń aıtýynsha, búginde elorda 300 gıgakalorııadan asatyn jylý tapshylyǵyna tap kelip otyr.

«Úkimet ákimdikpen birlesip jyl sońyna deıin №3 jylý-elektr ortalyǵynyń birinshi bóligin iske qosýdy qamtamasyz etip, eki gaz qazandyǵynyń qurylysyn aıaqtaýǵa tıis. Nysannyń ekinshi bóliginiń qurylysyn qarjylandyrý qanshalyqty oryndy ekenin, merzimderin jáne qarajat kózderin anyqtaý kerek», - dedi Prezıdent.