Prezıdent: Astanada JEO-ny – zańger, jylýtranzıtti – agronom, sý arnasyn – zootehnık basqaryp júr

ASTANA. QazAqparat – Árkim óziniń kásibimen aınalysýy kerek. Bul týraly elordany damytý máseleleri jónindegi keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Ótken jylytý maýsymy elorda úshin jylý qýatynyń zor tapshylyǵymen ótti. Negizinde jyly qystyń arqasynda kollapstan jaltara aldyq. Buǵan qosa jergilikti bılik shyn máninde olardy qalypty jylýmen qamtamasyz etýge daıyn emes bola tura, mıllıondaǵan sharshy metr turǵyn úıdiń qurylysyna kómek berýdi jalǵastyrýda. Qalanyń ınjenerlik ınfraqurylymyn damytý kóbine kommýnaldyq kásiporyndardy basqaratyn laýazymdy tulǵalardyń kásibıligine baılanysty», - dedi Prezıdent.

Osy rette Memleket basshysy elorda ákimi Jeńis Qasymbekke qalanyń kommýnaldyq kásiporyndarynyń basshylyq quramyna taldaý júrgizý tapsyrylǵanyn atap ótti.

«Bul tapsyrma, meniń túsinýimshe, áli de oryndalý satysynda tur. Elordada JEO-ny – zańger, Óńirlik elektr jelilik kompanııany – baǵalaýshy, jylýtranzıtti – agronom, qalalyq sý arnasyn – zootehnık basqaryp júr. Árkim óz kásibimen aınalysýy kerek. Áıtpese jumys nátıjeleri soǵan «laıyq» bolady», - dedi Qasym-Jomart Toqaev.

Osyǵan deıin Prezıdent Astanany jylýmen qamtamasyz etý júıesi ornyqty bolýy qajet ekenin atap ótti.