Prezıdent «Astana» halyqaralyq qarjy ortalyǵynyń basshysy Renat Bekturovty qabyldady

<p>ASTANA. KAZINFORM — Renat Bekturov AHQO-nyń byltyrǵy jáne bıylǵy I toqsanda atqarǵan jumysynyń nátıjeleri baıandap, ortalyqty damytý josparymen tanystyrdy. </p>

Qarjy ortalyǵy iske qosylǵan sátten beri elimizge 11 mıllıard dollardan astam (2023 jylǵy jáne osy jyldyń alǵashqy 3 aıyndaǵy 3,5 mıllıard dollar qarjyny qosa alǵanda) ınvestıtsııa tartýǵa atsalysqan.

Bul 2025 jylǵa aldyn ala belgilengen maqsatty kórsetkishten asqan.

Ótken jyly AHQO-da tirkelgen kompanııalardyń sany 670-ten (jalpy álemniń 78 elinen 2600-den asa kompanııa) asqany jóninde málimet berildi. Bul — rekordtyq kórsetkish.

Byltyr jáne osy jyldyń alǵashqy úsh aıynda Ortalyq qatysýshylary memleket bıýdjetine 48,7 mıllıard teńge salyq tólegen.

Daýlardy sheshýde AHQO soty men Halyqaralyq arbıtraj ortalyǵy sııaqty ınstıtýttar tabysty jumys istep jatyr. 2023 jyly 767 kommertsııalyq is qaralǵan.

Prezıdent qarjy ortalyǵyn odan ári damytýǵa qatysty birqatar ózekti mindetti aıqyndap berdi. Atap aıtqanda, AHQO-nyń óńir úshin jasyl qor tartý jáne Orta dálizdi damytý isindegi róline toqtaldy.

Elimizdegi «jasyl» oblıgatsııalar men kredıtterdiń 60 paıyzdan astamy AHQO Jasyl qarjy ortalyǵynyń qoldaýymen berildi.

Qarjy ortalyǵynyń ıýrısdıktsııasynda orta dáliz jobasy aıasynda birlesken kásiporyndar jumys istep jatyr.

Qasym-Jomart Toqaev qazirgi jaǵdaıda mámileler jasaý úshin AHQO ınfraqurylymyn belsendi paıdalana otyryp, Qazaqstan ekonomıkasyna ınvestıtsııa tartýǵa kómektesetin barlyq memlekettik organ men oǵan jetekshilik etetin qarjy ınstıtýttarynyń kúsh-jigerin biriktirý qajet ekenine nazar aýdardy.