Prezıdent Assambleıaǵa úlken úmit artyp otyr – Aıda Balaeva

NUR-SULTAN. QazAqparat – Prezıdent Qazaqstan halqy Assambleıasyna úlken úmit artyp otyr. Memleket basshysynyń «Jańa Qazaqstan: jańarý men jańǵyrý joly» atty Joldaýyn júzege asyrý joldaryn talqylaǵan jıynda Prezıdent ákimshiligi basshysynyń orynbasary Aıda Balaeva osyndaı pikir bildirdi, dep habarlaıdy QazAqparat tilshisi.

«Memleket basshysy Qazaqstan halqy Assambleıasyna úlken úmit artyp otyr. Reformalardyń kezekti paketin sizderdiń qoldaýyńyzben ǵana turaqty ári qaýipsiz iske asyrýǵa bolady. QHA jumys isteıtin salanyń kúrdeli ekeni barshaǵa aıan. Bul Reseı-Ýkraına shıelenisinen týyndaǵan geosaıası qıyndyqtar aıasynda aıqyn kórinip jatyr. Qazaqstan árqashan halyqtar arasyndaǵy baýyrlastyqty qoldaıdy. Bul - bizdiń ishki saıasatymyzdyń myzǵymas tuǵyry», - dedi ol.

Prezıdent ákimshiligi basshysynyń orynbasary Qazaqstan halqy yqtımal syn-qaterlerge jarııa túrde qarsy turýy kerek ekenin atap ótti.

«Táýelsizdigimizdiń tarıhynda talaı ret solaı áreket etkenbiz. Eń bir qıyn jaǵdaılarda Qazaqstandaǵy etnostar ortaq úıimizdegi beıbitshilik pen kelisim úshin bir shepte turyp kúrese bildi. Sonymen birge ultaralyq kórinisti ıdealdandyrýdyń qajeti joq. Ótkir máselelerdi anyqtap, óz quziretimiz sheginde aldyn alý shara qabyldaý kerek. Bul iste de arhaıkalyq júmys tásilinen arylyp, bıýrokratııalyq baǵyttardan, kópsózdilikten ketý kerek. Prezıdent ár sózinde tıimdi áreket etý basym baǵyt bolýy kerektigin aıtyp, qoǵamǵa ashyq bolýdyń úlgisin kórsetip júr», - dedi Aıda Balaeva.