Prezıdent áskerdegi tehnologııalyq jańǵyrtýǵa qatysty tapsyrma berdi

ASTANA. QazAqparat – Búgin elordada Búkilarmııalyq keńestiń otyrysynda Memleket basshysy Qasym-Jomart Toqaev áskerdegi tehnologııalyq jańǵyrtýdy jalǵastyrýdy tapsyrdy, dep habarlaıdy QazAqparat tilshisi.

«Zamanaýı qarý-jaraq pen tehnıkanyń, ásirese, dáldigi joǵary qarý-jaraqtardyń, ushqyshsyz ushaqtar men robottyq júıelerdiń úlesin arttyrý qajet. Áskerlerdiń utqyrlyǵyn arttyrý úshin áskerı-kólik avıatsııasy men jaýyngerlik mashınalar parkin ulǵaıtý kerek», - dedi Qasym-Jomart Toqaev.

Osy oraıda Prezıdent mańyzdy mindet retinde ozyq aqparattyq júıeler men tehnologııalardy engizý qajet ekenin aıtty.

Memleket basshysy sheshim qabyldaý tıimdiligin arttyrýǵa jáne jaýyngerlik bólimshelerdiń áleýetin arttyrýǵa erekshe nazar aýdarý kerek ekenin atap ótti. Bul óz kezeginde áskerlerdi qoldanýdyń tıimdiligin ádeýir arttyrýǵa múmkindik beredi.

Budan buryn habarlanǵandaı, Memleket basshysy Qasym-Jomart Toqaevtyń qatysýymen ótetin Búkilarmııalyq keńestiń otyrysy bastaldy.

Qorǵanys mınıstri Rýslan Jaqsylyqov 250 áskerı qyzmetshi Afrıkadaǵy mıssııaǵa daıyndalyp jatqanyn aıtty.