Prezıdent «Ashyq» júıesindegi karantın buzýshylarǵa talaptardy kúsheıtýdi tapsyrdy

NUR-SULTAN. QazAqparat – Memleket basshysy Qasym-Jomart Toqaev «Ashyq» júıesi anyqtaǵan karantın buzýshylarǵa talaptardy qatańdatýdy tapsyrdy, dep habarlaıdy Aqordanyń baspasóz qyzmeti.

«Buǵan deıin aıtqanymdaı, biz pandemııa jaǵdaıynda ómir súrip, jumys isteýdi úırenýimiz kerek. Bıznes pen tutynýshylar úshin bul «Ashyq» tsıfrlyq sheshiminiń arqasynda ǵana múmkin. Baǵdarlama óz maqsatyn aqtap keledi. Oǵan qosa, sońǵy ýaqytta vırýs juqtyrǵandar men baılanysta bolǵandar, ıaǵnı qoǵamdyq oryndarǵa baratyn «qyzyl» jáne «sary» mártebesi bar adamdar sany artyp keledi», - dedi Qasym-Jomart Toqaev elimizdegi epıdemıologııalyq ahýal jóninde keńeste.

Onyń aıtýynsha, baǵdarlama «qyzyl» jáne «sary» mártebelerdi tirkegennen keıin keı azamattar basqa demalys ornyn izdep ketedi.

«Shamasy, mundaı jaýapsyz adamdar aıyppuldan qoryqpaıdy, óıtkeni eshkim aıyppul salyp otyrǵan joq. Al JSN men ımmýndyq mártebe júıede tirkelip jatyr ǵoı. Mundaı jaýapsyzdyq jazalanýy kerek. Karantındik shekteýlerdi saqtamaǵany úshin talaptardy qatańdatýdy tapsyramyn», - dedi Q. Toqaev.

Aıta keteıik, Prezıdenttiń qatysýymen elimizdegi koronavırýs indetine baılanysty epıdemıologııalyq ahýal jóninde keńes ótip jatyr.