Prezıdent alpınıst Anar Borashevany qabyldady

<p>ASTANA. KAZINFORM &ndash; Memleket basshysy Qasym-Jomart Toqaev Anar Borashevany álemdegi eń bıik Everest shyńyn qazaq qyzdarynyń arasynan birinshi bolyp baǵyndyrýymen quttyqtady.</p>

Prezıdent onyń osynaý aıtýly jetistigi jastardy sportpen shuǵyldanýǵa jigerlendirgenin aıtty. Memleket basshysy sporttyń mundaı qıyn ári qaýipti túrimen aınalysý úshin asqan erik-jiger, tózimdilik, sondaı-aq psıhologııalyq jáne fızıkalyq daıyndyq kerek ekenine nazar aýdardy.

Anar Borasheva taýǵa órmeleýmen 2015 jyldan beri aınalysyp kele jatqanyn, al alpınızmniń qyr-syryn kásibı túrde sońǵy 4 jyl ishinde meńgergenin aıtty. Everestke deıin ol kóptegen shyńdy baǵyndyryp úlgergen. Onyń ishinde Alpi taýlaryndaǵy Monblan shyńy men Afrıkadaǵy eń bıik Kılımandjaro taýy bar.

Áńgimelesý barysynda alpınıst aldaǵy ýaqytta álemdegi eń bıik jeti shyńdy baǵyndyrýdy josparlap otyrǵanyn jetkizdi. Sondaı-aq ol Memleket basshysyna Everest shyńyna alyp shyqqan Qazaqstan týyn syıǵa tartty.

Qasym-Jomart Toqaev otandyq sportshylar ártúrli halyqaralyq dodalarda el namysyn laıyqty deńgeıde qorǵap júrgenin atap ótip, Anar Borashevanyń aldaǵy ýaqytta jańa bıikterdi baǵyndyra berýine tilektestik bildirdi.