Prezıdent Almatyda balalar úıiniń tárbıelenýshisine páter kiltterin tabys etti

ALMATY. QazAqparat – Qazaqstan Prezıdenti Qasym-Jomart Toqaev «Almaty – 2050» damý strategııasymen tanysty, dep habarlaıdy Aqorda.

Almaty qalasynyń ákimi Baqytjan Saǵyntaev Memleket basshysy Qasym-Jomart Toqaevqa «Almaty – 2050» damý strategııasynyń jobasyn tanystyrdy.

Atalǵan baǵdarlama boıynsha Almaty qalasyn áleýmettik-ekonomıkalyq turǵydan damytý, ınvestıtsııa tartý, jańa jumys oryndaryn ashý, turǵyndardyń turmysyn jaqsartý, qaýipsiz qala qalyptastyrý, shahardyń shetkeri aımaqtarynyń ınfraqurylymyn damytý jáne basqa da kóptegen mańyzdy máseleler atqarylady. Sondaı-aq Almaty aglomeratsııasy aýmaǵynyń damý barysy da qarastyrylǵan.

Qasym-Jomart Toqaev baspana kezeginde turǵan, Balalar úıiniń 12 tárbıelenýshisine páter kiltterin tabys etti.

«Barshańyzǵa jańa qonystaryńyz qutty bolsyn! Baspana máselesi árdaıym memlekettiń nazarynda bolady. Eńbekterińiz tabysty bolsyn!» – dedi Memleket basshysy.

Jalpy Almaty qalasynyń «Kókqaınar» yqsham aýdanynda «Nurly jer» baǵdarlamasy boıynsha baspanaǵa muqtaj osyndaı 51 adamǵa turǵyn úı salynyp jatyr.