Prezıdent alǵashqy bolyp QAZAQ TILI qoryna jeke jarna aýdardy

<p>Súıinshi habardy &laquo;Halyqaralyq &laquo;Qazaq tili&raquo; qoǵamy&raquo; qoǵamdyq birlestiginiń prezıdenti Raýan Kenjehanuly jetkizdi, dep habarlaıdy <a href="https://kaz.inform.kz/?_gl=1*1cookbu*_ga*MTMxOTQ2NjU5MC4xNjk4Mzc1OTcw*_ga_Y44SMVECD5*MTY5ODM3NTk2OS4xLjAuMTY5ODM3NTk2OS42MC4wLjA.&amp;pk_vid=1dac2fba2c02ff6916983759715aaacc" target="_blank" rel="noopener">Kazinform</a>.</p>

«Til janashyrlarynan, qazaq qaýymynan súıinshi surar retim bar. 12 qazan kúni Prezıdenttiń qabyldaýynda memlekettik tildi damytýǵa arnalǵan endaýment qoryn qurýdy usyndym. Memleket basshysy usynysty qoldaǵan edi. QAZAQ TILI Endowment qoryn qurý, tirkeý, rásimdeý sharalary jaqynda aıaqtalyp, búgin Qasym-Jomart Kemeluly sol qorǵa birinshi bolyp 7 mıllıon teńge kóleminde jeke jarna aýdardy», — dep jazdy ol Facebook-te.

Onyń atap ótýinshe, bul qordyń basty mindeti — memlekettik tildi qoldaý jáne damytýmen aınalysatyn elimizdegi eń iri uıym — «Qazaq tili» qoǵamynyń turaqty ári uzaq merzimdi damýyn qamtamasyz etý. Endaýment qorynyń ereksheligi — qorǵa jınalǵan qarjy jumsalmaıdy. Qordaǵy qarajat basqarýǵa beriledi jáne ınvestıtsııaǵa quıylady. Investıtsııalyq qyzmetten túsken tabys «Qazaq tili» qoǵamynyń jarǵylyq mindetterine jumsalady.

«Álem elderinde bilim berý men áleýmettik baǵytta jumys isteıtin qoǵamdyq uıymdardyń turaqty ári uzaqmerzimdi qyzmetin qamtamasyz etý úshin endaýment qoryn qurý tájirıbesi keń taralǵan. Qazir Japonııadaǵy ǵylym men tehnologııa qory, sonymen qatar, Stenford, Garvard ýnıversıtetteriniń qorlary dúnıejúzindegi eń iri endaýment qorlarynyń qataryna kiredi. Qazaqstanda da iri ýnıversıtetter, mektepter men kommertsııalyq emes uıymdardyń endaýment qorlary sátti jumys istep keledi. QAZAQ TILI Endowment qoryn bedeldi qoǵam qaıratkerleri, ǵalym-lıngvıster men memleket ókilderinen quralǵan táýelsiz qamqorshylar keńesi baqylaıdy», — deıdi birlestik basshysy.

Raýan Kenjehanulynyń atap ótýinshe, Memleket basshysy «Qazaq tili» qoǵamyna qazaq tilindegi medıa jáne baspa kontentin kóbeıtý úshin naqty jobalar men sharalar keshenin júzege asyrý, tildi oqytý men úıretý ádistemesin jetildirý, oqý saýattylyǵy men jazý mádenıetin damytý, sonymen qatar, qazaq tilin qoldaý men tildi qoldanatyn qaýymdastyq aıasyn keńeıtý maqsatynda zamanaýı tehnologııalyq sheshimderdi keńinen paıdalanýdy tapsyrdy.

«Prezıdent kórsetken úlgini el azamattary, til janashyrlary, kásipkerler keńinen qoldaıdy dep senemiz. QR Prezıdenti Qasym-Jomart Kemeluly Toqaevqa ana tilimizge degen ADAL AZAMATTYQ ustanymy, kórsetken zor qurmeti, jeke úlgisi úshin alǵys bildiremiz!», — dedi ol.