Prezıdent áleýmettik-ekonomıkalyq damýǵa qatysty naqty mindetter qoıdy - depýtat
«Jyl basynda bolǵan oqıǵalar memlekettik saıasattyń ádiletti ári ashyq júrgizilýin talap etýde. Kelisemiz, búginde bizdiń aldymyzda búkil qoǵamdyq tynys-tirshilikti túbegeıli transformatsııalaý mindeti tur. Munyń strategııalyq máni jastardyń áleýmettik-ekonomıkalyq ál-aýqatyn kóterýmen tikeleı baılanysty. Keshe ǵana Úkimettiń keńeıtilgen otyrysynda Memleket basshysy Qasym-Jomart Toqaev: «Jańa Qazaqstandy qurý úshin túsinikti ári ádil memlekettik saıasat júrgizilýi kerek», – dep dóp basyp aıtty. Sondaı-aq, Prezıdent elimizdegi jastardyń shynaıy múmkindikteri týraly aşy shyndyqty kórsetti. Jastar arasynda adal eńbektiń laıyqty baǵalanbaýy, olardyń ortasynda qylmystyq toptarmen baılanysy bar azamattardyń kóleńkeli lıderge aınalýyna ákelip soqtyrdy. Mundaı toptar áleýmettik jeliler arqyly ózderiniń patsha ómirlerin kórsetip, talaı jastarymyzdyń sanasyn buzyp keledi. Tipti, keıbiri solarǵa qarap boı túzeıtin boldy», - dedi E. Beısenbaev Premer-Mınıstri Álıhan Smaıylovtyń atyna joldaǵan saýalynda.
Onyń aıtýynsha, kóleńkeli saýdasy orasan, ádiletsiz deldaldyq júıe qalyptastyrǵan «Altyn orda» sııaqty bazarlardy zamanaýı ashyq bıznes ortaǵa aınaldyrý tapsyryldy. Bul másele sondaǵy jastardyń sapaly áleýmettenýine shynaıy septigin tıgizetini sózsiz.
«Prezıdentimizdiń «Adal eńbek etý – bárimizge ortaq mindet» degen bastamasy árbir jastyń ustanymyna aınalýy tıis dep esepteımin. Nege deseńiz, Memleket basshysy qoǵamda ultty jegideı jeıtin keselderdiń biri – masyldyqty tilge tıek etti. Jumys isteýdiń ornyna jaqyndaryna aýyrtpashylyq salyp, óz ómirine degen jaýapkershilikti sezinbeıtin jastarymyz da barshylyq. Áreketsizdik pen enjarlyqtyń shyrmaýynda ketken jastarymyzǵa «eńbek, bárin jeńbek» qaǵıdatyn ustanýǵa shaqyramyn. Dál qazir, elge kómekti eńbekpen kórsetetin ýaqyttyń jetkenin moıyndaýymyz qajet. Árıne, elimizdegi jastardyń máselesine baılanysty qaǵaz júzindegi daıarlanatyn aqparattar men onyń qazirgi shynaıy jaǵdaıynyń arasyndaǵy alshaqtyq syn kótermeıtinin bilemiz. Sondyqtan, jastar arasyndaǵy jumyssyzdyqty azaıtýǵa erekshe nazar aýdarý kerek. Ásirese, NEET sanatyndaǵy jastardyń kóbi kezdeısoq tabystyń arqasynda ómir súredi», - dedi depýtat.
Osy rette ol 700 myń jumys ornyn ashý is júzinde oryndalýy kerek ekenin atap ótti.
«Qasym-Jomart Toqaev elimizdiń áleýmettik-ekonomıkalyq damýyna qatysty kóptegen máseleni talqylap, aldymyzǵa naqty mindetter qoıdy. Bul mindetterdiń basym bóligi eldiń úshten bir bóligin quraıtyn jastardy (14 pen 35 jas aralyǵyndaǵy jastardyń sany – 6,2 mıllıon) qoldaýǵa baǵyttalatyny anyq», - dedi Elnur Beısenbaev.