Prezıdent Aqtóbedegi keramogranıt jáne qysh plıtalar shyǵaratyn zaýytty aralady

<p>Memleket basshysy &laquo;Zerde-Keramıka Aqtóbe&raquo; jaýapkershiligi shekteýli seriktestiginiń jumysymen tanysty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Aqordanyń jelidegi resmı paraqshasynyń jazýynsha, ındýstrıaldy aımaqta ornalasqan óndiristik nysannyń aýmaǵy – 15 gektar. Zaýyt jylyna 5 mıllıon sharshy metr ónim óndiredi.

Zaýyttyń atqarýshy dırektory Dáýren Bıtemirovtiń aıtýynsha, munda shyǵarylatyn keramogranıt pen qysh plıtalar Qazaqstannyń batys óńirleriniń suranysyn tolyǵymen óteıdi. Sonymen qatar Reseı, Tájikstan, Qyrǵyzstan, Ózbekstan elderine de eksporttalady.

Óndiristiń barlyq jumysy tolyqtaı avtomattandyrylǵan. Bul zaýyttyń ereksheligi sanalady. Júıe ıtalııalyq SACMI fırmasynyń zamanaýı qondyrǵysy arqyly basqarylady.

Nysanǵa 9,2 mıllıard teńge kóleminde ınvestıtsııa tartylǵan. «Óndiristi damytý qory» aktsıonerlik qoǵamynan qondyrǵylar satyp alý úshin memleket 7,5 mıllıon eýro kóleminde nesıe alýǵa qoldaý kórsetken.